स्व.बाळासाहेब ठाकरे उपसा सिंचन प्रकल्पाला प्रशासकीय मान्यता - दादासाहेब लवटे
८८३ कोटी ७८ लाख रुपयांचा खर्च अपेक्षित, ३९ हजार एकर क्षेत्र ओलिताखाली येणार
(शब्दरेखा एक्सप्रेस संपादक संतोष साठे ९५०३४९७८१२)
सांगोला (प्रतिनिधी): सांगोला तालुक्यातील वंचित 12 गावांसाठी वरदायिनी असलेल्या बहुप्रतिक्षित स्वर्गीय बाळासाहेब ठाकरे उपसा सिंचन योजनेला प्रशासकीय मान्यता मिळाली असून सुमारे ३९ हजार एकर क्षेत्र ओलिताखाली येणार आहे. आमदार शहाजीबापू यांच्या पाठपुराव्याला यश आले
असून या योजनेसाठी सुमारे ८८३ कोटी ७८ लाख रुपयांच्या खर्चाला प्रशासकीय मान्यता मिळाल्याने तालुक्याची वाटचाल हरितक्रांतीकडे सुरू असल्याचे शिवसेनेचे तालुकाप्रमुख दादासाहेब लवटे यांनी सांगितले.
सन १९९७ मध्ये मूळ मंजूर असलेली ७३.५९ कोटी रुपयांच्या सांगोला उपसा सिंचन योजनेच्या कामाला २००० साली प्रशासकीय मान्यता मिळाली होती. त्यावेळी १६ हजार एकर क्षेत्र यामध्ये समाविष्ट होते.
परंतु सदर योजनेच्या कोणत्याही कामाला सुरुवात न झाल्याने मंजुरीनंतर २००६ साली याची प्रशासकीय मान्यता व्यपगत झाली. आमदार झाल्यानंतर शहाजीबापू पाटील यांनी २०२० सालापासून
या कामाचा सातत्याने पाठपुरावा केला व नव्याने १२ वंचित गावे व सांगोला शाखा कालव्यावरील उच्च भागामध्ये असणारी गावे यासाठी प्रस्ताव तयार करून सुमारे ३९ हजार एकर क्षेत्राचा यामध्ये समावेश केला.
सांगोला तालुक्यासाठी वरदायिनी असलेल्या स्व.बाळासाहेब ठाकरे उपसा सिंचन प्रकल्पाला २०२२-२३ च्या दरसुचीवर आधारित ८८३ कोटी ७८ लाख रुपयांच्या खर्चास मंत्रिमंडळाची प्रशासकीय मान्यता मिळाली आहे.
प्रत्यक्ष कामासाठी ७८९ कोटी ५९ कोटी रुपये खर्च अपेक्षित आहे. तर अनुषंगिक कामासाठी ९२ कोटी ८५ लाख रुपयांचा खर्च अपेक्षित आहे.
बंदिस्त नलिका करण्यासाठी २५७ कोटी ३४ लाख ४६ हजार रुपयांचा निधी उपलब्ध झाला आहे. तर पाणी वापर संस्था व प्रशिक्षण यासाठी ३ कोटी ५० लाख ६७ हजार रुपयांचा निधी उपलब्ध झाला आहे.
आस्थापना, संयंत्रे व इतर खर्चासाठी ९२ कोटी ८५ लाख ४२ हजार रुपयांचा निधी उपलब्ध होणार आहे. आमदार शहाजीबापू पाटील यांनी राज्याचे मुख्यमंत्री एकनाथ शिंदे, उपमुख्यमंत्री देवेंद्र फडणवीस उपमुख्यमंत्री अजित पवारांकडे वारंवार पाठपुरावा केल्याने
मंत्रिमंडळाच्या बैठकीमध्ये या योजनेला सुधारित प्रशासकीय मान्यता देण्यात आल्याची माहिती शिवसेनेचे तालुकाप्रमुख दादासाहेब लवटे यांनी दिली.
आमदार शहाजीबापू पाटील यांच्या मागणीनुसार मुख्यमंत्री एकनाथ शिंदे सरकारने १७ नोव्हेंबर 2022 मध्ये या योजनेचे स्वर्गीय बाळासाहेब ठाकरे उपसा सिंचन योजना सांगोला असे नामकरण केले.
या योजनेतून दीड टीएमसी पाणी बंदीस्त वितरण नलिकेतून लक्ष्मीनगर, अचकदाणी, बागलवाडी, सोनलवाडी, अजनाळे, वाकी शिवणे, नरळेवाडी,
य.मंगेवाडी, बंडगरवाडी, चिकमहूद, कटफळ, खवासपूर, जुनी लोटेवाडी, नवी लोटेवाडी व इटकी या १२ गावांना सुमारे ३३ हजार एकर क्षेत्र ओलिताखाली येणार आहे. तर अर्धा टीएमसी पाण्यातून
सांगोला शाखा कालवा ५ वरील सुमारे ६ हजार एकर असे एकूण ३९ हजार एकर क्षेत्र नव्याने ओलिताखाली येणार आहे. दुष्काळी सांगोला तालुका ही ओळख कायमस्वरूपी पुसली जाणार असल्याचे शिवसेनेचे तालुकाप्रमुख दादासाहेब लवटे यांनी दिली.
0 Comments