डॉ. गणपतराव देशमुख यांच्या पाचव्या पुण्यस्मरण दिनानिमित्त विनम्र अभिवादन; त्यांच्या विचारांचा वारसा जपण्याचा संकल्प

डॉ. गणपतराव देशमुख यांच्या पाचव्या पुण्यस्मरण दिनानिमित्त विनम्र अभिवादन; त्यांच्या विचारांचा वारसा जपण्याचा संकल्प

सांगोला, दि. ३० : सांगोला तालुक्याच्या सामाजिक, शैक्षणिक, कृषी आणि राजकीय क्षेत्राला नवी दिशा देणारे सांगोला तालुका शेतकरी शिक्षण प्रसारक मंडळाचे संस्थापक 

अध्यक्ष, ज्येष्ठ समाजसेवक, माजी आमदार तथा लोकनेते स्वर्गीय डॉ. भाई गणपतराव देशमुख यांच्या पाचव्या पुण्यस्मरण दिनानिमित्त डॉ. गणपतराव देशमुख महाविद्यालय, 

सांगोला येथे अत्यंत भावपूर्ण वातावरणात विनम्र अभिवादनाचा कार्यक्रम आयोजित करण्यात आला. महाविद्यालयातील शिक्षक, शिक्षकेतर कर्मचारी व विद्यार्थी-विद्यार्थिनी यांनी मोठ्या संख्येने उपस्थित राहून आबासाहेबांच्या कार्याला कृतज्ञतापूर्वक अभिवादन केले.

कार्यक्रमाच्या प्रारंभी महाविद्यालयाचे प्रभारी प्राचार्य प्रा. डॉ. शंकर धसाडे, प्रा. डॉ. जगन्नाथ ठोंबरे, प्रा. अशोकराव कांबळे, प्रा. डॉ. पांडुरंग रुपनर आणि प्रा. विजय पवार यांच्या हस्ते

 स्व. डॉ. भाई गणपतराव देशमुख यांच्या प्रतिमेस पुष्पहार अर्पण करून अभिवादन करण्यात आले. यानंतर उपस्थितांनी दोन मिनिटे मौन पाळून त्यांच्या पवित्र स्मृतींना आदरांजली वाहिली.

यावेळी मनोगत व्यक्त करताना प्रभारी प्राचार्य प्रा. डॉ. शंकर धसाडे यांनी स्व. डॉ. गणपतराव देशमुख यांच्या बहुआयामी कार्याचा गौरवपूर्ण आढावा घेतला.

 ते म्हणाले की, आबासाहेबांनी आपल्या संपूर्ण आयुष्यात राजकारण हे केवळ सत्तेचे माध्यम न मानता समाजसेवेचे प्रभावी साधन म्हणून स्वीकारले.

 त्यांनी अनेक दशके सांगोला मतदारसंघाचे प्रतिनिधित्व करताना विकासकामांना सर्वोच्च प्राधान्य दिले. सामान्य शेतकरी, कष्टकरी, विद्यार्थी, महिला आणि वंचित समाजघटकांच्या प्रश्नांना न्याय मिळवून 

देण्यासाठी त्यांनी सातत्याने संघर्ष केला. त्यांच्या प्रामाणिक, पारदर्शक आणि लोकाभिमुख नेतृत्वामुळे त्यांनी जनतेच्या मनात कायमचे स्थान निर्माण केले असून आजही संपूर्ण सांगोला तालुका त्यांना आपल्या दैवताप्रमाणे मानतो.

प्रा. डॉ. धसाडे पुढे म्हणाले की, ग्रामीण भागातील विद्यार्थ्यांना उच्च शिक्षणाच्या संधी उपलब्ध करून देण्यासाठी आबासाहेबांनी सांगोला तालुका शेतकरी शिक्षण प्रसारक मंडळाची स्थापना केली. या संस्थेच्या माध्यमातून डॉ. गणपतराव देशमुख महाविद्यालय,

 न्यू इंग्लिश स्कूल व ज्युनिअर कॉलेज यांसारख्या शैक्षणिक संस्थांची उभारणी करून त्यांनी ग्रामीण विद्यार्थ्यांसाठी गुणवत्तापूर्ण शिक्षणाची दारे खुली केली. शिक्षणासोबतच आधुनिक तंत्रज्ञान, संशोधनाभिमुख दृष्टी, संस्कारमूल्ये आणि सामाजिक जबाबदारी

 यांचा समन्वय साधणारी शैक्षणिक परंपरा त्यांनी निर्माण केली. त्यांच्या दूरदृष्टीमुळे हजारो विद्यार्थी शिक्षित होऊन विविध क्षेत्रात उल्लेखनीय कार्य करत असून, हेच त्यांच्या कार्याचे खरे यश असल्याचे त्यांनी नमूद केले.

त्यांनी आबासाहेबांच्या साधेपणा, प्रामाणिकपणा, तत्त्वनिष्ठा, लोकहितवादी दृष्टिकोन आणि समाजाप्रती असलेल्या अखंड बांधिलकीचा विशेष उल्लेख करत, त्यांच्या विचारांचा वारसा पुढील पिढीपर्यंत पोहोचविण्याची जबाबदारी 

प्रत्येक शिक्षक, विद्यार्थी आणि नागरिकाची असल्याचे सांगितले. त्यांच्या जीवनातून प्रेरणा घेऊन समाजहित, शिक्षणविस्तार आणि राष्ट्रनिर्मितीच्या कार्यात प्रत्येकाने सक्रिय सहभाग घ्यावा, असे आवाहनही त्यांनी केले.

कार्यक्रमाचे सूत्रसंचालन प्रा. अशोकराव कांबळे यांनी प्रभावीपणे केले. त्यांनी आबासाहेबांच्या कार्याचा संक्षिप्त परिचय करून देत त्यांच्या सामाजिक आणि शैक्षणिक योगदानाची माहिती उपस्थितांना दिली. 

प्रास्ताविकात त्यांनी संस्थेच्या स्थापनेपासून आजपर्यंतच्या वाटचालीत आबासाहेबांच्या योगदानाचे महत्त्व अधोरेखित केले.

कार्यक्रमाच्या शेवटी प्रा. डॉ. पांडुरंग रुपनर यांनी उपस्थितांचे आभार मानले. त्यांनी आबासाहेबांच्या विचारांचा वारसा जपण्यासाठी प्रत्येकाने आपल्या कार्यक्षेत्रात प्रामाणिकपणे योगदान देण्याचा संकल्प व्यक्त केला.

या अभिवादन कार्यक्रमास महाविद्यालयातील सर्व प्राध्यापक, शिक्षकेतर कर्मचारी, विद्यार्थी-विद्यार्थिनी तसेच संस्थेचे हितचिंतक मोठ्या संख्येने उपस्थित होते. संपूर्ण कार्यक्रमात अत्यंत भावपूर्ण 

आणि प्रेरणादायी वातावरण निर्माण झाले होते. कार्यक्रमाचा समारोप स्वर्गीय डॉ. भाई गणपतराव देशमुख यांच्या कार्याला विनम्र अभिवादन करून तसेच त्यांच्या शिक्षण, समाजसेवा, प्रामाणिक नेतृत्व आणि लोककल्याणाच्या

 विचारांचा वारसा पुढील पिढीपर्यंत पोहोचविण्याचा दृढ संकल्प व्यक्त करून करण्यात आला. संस्थेचे शिंदे आणि संस्था सदस्या अस्था देशमुख यांच्या मार्गदर्शनाखाली सदरचा कार्यक्रम संपन्न झाला.