महाराष्ट्रात विधानपरिषदेच्या १७ जागांसाठी निवडणूक हालचालींना वेग; राजकीय वातावरण तापणार

महाराष्ट्रात विधानपरिषदेच्या १७ जागांसाठी निवडणूक हालचालींना वेग; राजकीय वातावरण तापणार

राज्यातील राजकारणात पुन्हा एकदा निवडणुकीचा रंग दिसण्याची चिन्हे आहेत. स्थानिक स्वराज्य संस्थांच्या निवडणुका पार पडल्यानंतर

 आता विधानपरिषदेतील रिक्त जागांवर निवडणूक घेण्याचा मार्ग मोकळा झाला आहे. यामुळे पावसाळी अधिवेशनापूर्वी विधानपरिषदेच्या सदस्यसंख्येत वाढ होण्याची शक्यता वर्तवली जात आहे.

सूत्रांच्या माहितीनुसार, स्थानिक स्वराज्य संस्थांशी संबंधित १७ जागांसाठी पुढील आठवड्यात निवडणूक जाहीर होण्याची शक्यता आहे. या जागा मागील सुमारे अडीच वर्षांपासून रिक्त होत्या. 

पूर्वी स्थानिक स्वराज्य संस्थांच्या निवडणुका प्रलंबित असल्याने आवश्यक मतदारसंख्या पूर्ण होत नव्हती. मात्र आता निवडणुका झाल्यामुळे किमान ७५ टक्के मतदार उपलब्ध असल्याने निवडणूक प्रक्रिया सुरू होण्याची शक्यता आहे.

विधानपरिषदेतील एकूण ७८ सदस्यांपैकी २२ सदस्य स्थानिक स्वराज्य संस्थांमधून निवडले जातात. त्यापैकी सध्या १७ जागा रिक्त असल्याने या निवडणुकीकडे सर्व राजकीय पक्षांचे लक्ष लागले आहे.

 पावसाळी अधिवेशनापूर्वी मतदान प्रक्रिया पूर्ण झाल्यास विधानपरिषदेत राजकीय समीकरणांमध्ये बदल होऊ शकतो, असा अंदाज व्यक्त केला जात आहे.

संभाव्य निवडणूक होऊ शकणारे मतदारसंघ:

अहिल्यानगर, सोलापूर, ठाणे, जळगाव, सांगली–सातारा, नांदेड, यवतमाळ, पुणे, भंडारा–गोंदिया, रायगड–रत्नागिरी–सिंधुदुर्ग, नाशिक, वर्धा–चंद्रपूर–गडचिरोली, परभणी–हिंगोली, अमरावती, धाराशिव–लातूर–बीड, संभाजीनगर–जालना आणि नागपूर.

या निवडणुकांमुळे स्थानिक पातळीवरील सत्तासमीकरणाचा थेट परिणाम विधानपरिषदेच्या रचनेवर दिसू शकतो. कोणता पक्ष या लढतीत आघाडी घेणार, हे निवडणूक जाहीर झाल्यानंतर स्पष्ट होणार आहे.