खळबळजनक...कोल्हापूर कारमधून दोन कोटींची रोकड हस्तगत; दोघे ताब्यात सांगोल्यातील एकजण..

खळबळजनक...कोल्हापूर कारमधून दोन कोटींची रोकड हस्तगत; दोघे ताब्यात सांगोल्यातील एकजण..

कोल्हापूर : कारमधून एक कोटी 98 लाख 99 हजार 500 रुपयांची रोकड घेऊन जाणार्‍या दोघांना शाहूपुरी पोलिसांनी रोख

 रकमेसह शुक्रवारी रात्री उशिरा ताब्यात घेतले. किरण हणमंत पवार (रा. देवापूर, ता.माण, जि. सातारा), 

व आण्णा सुभाष खडतरे (सांगोला, जि. सोलापूर) अशी त्यांची नावे आहेत. संबंधित रक्कम कर्नाटकातील उडपी येथे पोहोचवण्यासाठी नेण्यात येत होती, अशी माहिती प्राथमिक तपासात दोघांनी दिली. 

दरम्यान ही रक्कम कुठून आणण्यात आली, याचा शोध शाहूपुरी पोलिसांसह आयकर विभागाकडून घेण्यात येत आहे. पंचनामा करून रक्कम ताब्यात घेण्यात आली आहे, 

अशी माहिती शाहूपुरी पोलिस ठाण्याचे निरीक्षक संतोष डोके यांनी पत्रकारांना दिली. थर्टीफर्स्टच्या पार्श्वभूमीवर शाहूपुरीसह परिसरात शुक्रवारी

 रात्री नाकाबंदीसह गस्तीपथके कार्यरत असताना नागाळा पार्क, जिल्हाधिकारी कार्यालय परिसरात कॉन्स्टेबल दिगंबर कुंभार, रत्नदीप जाधव यांना जिल्हाधिकारी कार्यालयाजवळील 

एका हॉटेलच्या पिछाडीला अंधारात थांबलेली कार आढळली. पोलिसांनी कारजवळ जाऊन चौकशीचा प्रयत्न करताच कारमधील किरण पवार व आण्णा खडतरे यांची संशयास्पद हालचाल दिसून आली.

पोलिसांनी दोघांना खडसावून विचारणा केली. मात्र त्यांनी उडवाउडवीची उत्तरे देत टाळण्याचा प्रयत्न केला. पोलिसांना संशय बळावताच त्यांनी कारचा दरवाजा उघडला असता दोन बॅगांसह सीटखाली व पायाजवळ नोटांची बंडले सापडली. कॉन्स्टेबल कुंभार, जाधव

 यांनी तत्काळ पोलिस निरीक्षक संतोष डोके यांच्याशी संपर्क केला. डोके लागलीच घटनास्थळी दाखल झाले. त्यांनीही दोघांकडे चौकशीचा प्रयत्न केला.पण ते दाद देत नव्हते. पोलिसांनी पंचनामा करून रोकड ताब्यात घेतली.

 आयकर विभागाचे निरीक्षक अमोल पंढरपूरकर. विनयकुमार दुबे यांच्या उपस्थितीत इनकॅमेरा रक्कम जप्तीची कारवाई करण्यात आली. रात्री उशिरापर्यंत दोघांकडे चौकशी सुरू होती. 

जप्त रक्कम कोल्हापूर येथील माणिक पाटील यांच्याकडून घेतल्याची त्यांनी माहिती दिली. उडपी येथील काही सराफी व्यावसायिकाकडे ही रक्कम पोहोच करण्यासाठी नेण्यात येत असल्याचेही त्यांनी सांगितले.