हृदयद्रावक घटना...विज्ञान शाखेत शिक्षण घेणाऱ्या
आजाराला कंटाळून विद्यार्थिनीची आत्महत्या !
आजाराला कंटाळून विज्ञान शाखेत शिक्षण घेणाऱ्या एका विद्यार्थिनीने आत्महत्या केल्याची अत्यंत हृदयद्रावक घटना मोहोळ तालुक्यात घडली आहे.
वेगवेगळ्या कारणांनी तरुण तरुणीच्या आत्महत्या होताना दिसत असतात परंतु ही आत्महत्या एकदम चटका लावून जाणारी ठरली आहे. मोहोळ तालुक्यातील पोखरापूर येथील नम्रता भोसले या २२ वर्षीय तरुणीने घरातच गळफास घेवून आपल्या जीवनाचा शेवट केल्याची धक्कादायक बाब आज उघडकीस आली. नम्रता भोसले ही शास्त्र शाखेत शिक्षण घेत होती.
नम्रताला अपेंडिक्स चा आजार होता आणि याच आजाराला कंटाळून तिने हे टोकाचे पाउल उचलले असून पोखरापूर परिसर आणि मोहोळ तालुक्यात या घटनेने हळहळ व्यक्त होऊ लागली आहे. आज शुक्रवारी दुपारी ही घटना घडली.
पोलीस सूत्राकडून मिळालेल्या माहितीनुसार नम्रताचे वडील संजय भोसले हे पंढरपूर - मोहोळ दरम्यान सुरु असलेल्या रस्त्याच्या कामावर मजुरी करतात. त्यांच्या घरची आर्थिक परिस्थिती बेताचीच आहे.
संजय भोसले हे नेहमीप्रमाणे रस्त्याच्या कामावर गेले होते तर त्यांच्या पत्नी संगीता या शेतात गेलेल्या होत्या. त्यांचा मुलगा तुषार हा देखील चंद्रमौळी औद्योगिक वसाहतीत कामासाठी गेलेला होता. लहान मुलगा विशाल हा नेहमीप्रमाणे शाळेसाठी गेला होता.
त्यामुळे घरात नम्रताशिवाय कुणीच नव्हते. बारामती येथे शिक्षण घेणारी नम्रता तीन दिवसांपूर्वीच पोखरापूर येथे आपल्या घरी आली होती. बऱ्याच दिवसांपासून नम्रताला अपेंडिक्स या आजारामुळे पोटात दुखण्याचा त्रास होत होता.
घरची आर्थिक परिस्थिती नाजूक असल्यामुळे या उपचारासाठी पुरेसे पैसे नव्हते त्यामुळे शस्त्रक्रिया करण्यासाठी नम्रताचे आईवडील पैसा जमा करीत होते.
तिला पोटात दुखण्याचा त्रास होत असल्याने वडील संजय भोसले हे तिची फोनवरून चौकशी करीत होते. अशीच चौकशी करण्यासाठी त्यांनी जेंव्हा दुपारी साडे बारा वाजण्याच्या सुमारास फोन केला तेंव्हा नम्रताने प्रतिसाद दिला नाही.
नम्रताच्या आई संगीता या दुपारी एक वाजण्याच्या सुमारास घरी आल्या तेंव्हा त्यांना नम्रताने गळफास घेतला असल्याचे दिसले. त्यांनी आपले पती संजय यांना याची माहिती दिली तसेच नम्रताला तातडीने रुग्णालयात नेण्यात आले परंतु उपचारापूर्वीच नम्रताचा मृत्यू झाला असल्याचे डॉक्टरांनी सांगितले.
या अत्यंत हृदयद्रावक घटनेने सर्वांनाच धक्का बसला असून भोसले कुटुंबावर तर आभाळ कोसळले आहे. आजाराला वैतागून एका तरुण विद्यार्थिनीला आत्महत्या करण्याची वेळ येते हे दु:खद असून मनाला चटका लावणारे ठरले आहे.
0 Comments