राजकीय पक्षांच्या आश्वासनांना चाप ; मतदारांना " फ्री गिफ्ट "चे प्रलोभन दाखवण्यावर बंदी येणार ?

 राजकीय पक्षांच्या आश्वासनांना चाप ; मतदारांना " फ्री गिफ्ट "चे प्रलोभन दाखवण्यावर बंदी येणार ?

मतदारांना एखादी गोष्ट मोफत देण्याचे प्रलोभन दाखवणे कितपत योग्य आहे ? ' , असा सवाल करत सर्वोच्च न्यायालयाने  याबाबत केंद्र सरकार आणि केंद्रीय निवडणूक आयोग यांना नोटीस बजावली आहे .

करदात्यांच्या पैशातून अशा फ्री गिफ्ट दिल्या जात असतील तर ही गंभीरबाब असून याला पायबंद कसा घालता येईल . याबाबत चार आठवड्यात म्हणणे मांडावे , असे निर्देश सर्वोच्च न्यायालयाने निवडणूक आयोग तसेच केंद्र सरकारला दिले आहेत . 

भाजपचे अश्विनी कुमार यांनी याबाबत सर्वोच्च न्यायालयात याचिका दाखल केली आहे . मतदारांना मोफत योजनांची प्रलोभने दाखवणाऱ्या राजकीय पक्षांची नोंदणी निवडणूक आयोगाने रद्द करावी, त्या पक्षाचे निवडणूक चिन्ह गोठवावे तसेच याबाबत कायदा करण्याचे निर्देश केंद्र सरकारला द्यावे , अशी विनंती अश्विनी कुमार यांनी याचिकेत केली आहे .

 या याचिकेवर सरन्यायाधीश एन . व्ही . रमण , न्या . ए . एस . बोपन्ना आणि हिमा कोहली यांच्या पीठासमोर सुनावणी झाली असता , ही अत्यंत गंभीर बाब असल्याचे निरीक्षण पीठाने नोंदवले आहे. निवडणुका जिंकण्यासाठी मोफत योजनांच्या घोषणा केल्या जातात . अनेकदा त्याचे बजेट हे एकूण बजेटपेक्षाही अधिक असते . 

यावर नियंत्रण आणण्यासाठी आम्ही आधीच निवडणूक आयोगाला निर्देश दिलेले आहेत . त्यानंतर त्याबाबत केवळ एक बैठक झाली . त्यात राजकीय पक्षांची मते मागवण्यात आली पण पुढे त्याचे काय झाले , आम्हाला कळलेले नाही ' , असे नमूद करत सरन्यायाधीश रमण यांनी नाराजी व्यक्त केली . याचिकाकर्त्यांच्या प्रतिज्ञापत्रात केवळ तीन पक्षांची नावे आहेत .

 त्यावरून सरन्यायाधीशांनी फटकारले व यात निवडक पक्ष आणि राज्यांची नावे का , असा प्रश्न सरन्यायाधीशांनी विचारला . त्यावर असा आमचा कोणताही उद्देश नसून अन्य राजकीय पक्षांची नावेही यात नमूद करण्यात येतील असे याचिकाकर्त्यांचे वकील विकास सिंह यांनी स्पष्ट केले .

 याचिकाकर्ते अश्विनी कुमार यांनी पंजाब आणि उत्तर प्रदेश विधानसभा निवडणुकीत तेथील राजकीय पक्षांनी केलेल्या घोषणांचा दाखला याचिकेत दिला आहे . 

आम आदमी पक्षाने १८ वर्षांवरील प्रत्येक महिलेला दरमहा एक हजार रुपये देण्याचे वचन दिले आहे . शिरोमणी अकाली दलाने पंजाबमध्ये महिलांना दरमहा दोन हजार रुपये देण्याची घोषणा केली आहे . काँग्रेसने प्रत्येक गृहिणीला दरमहा दोन हजार रुपये आणि वर्षभरात ८ गॅस सिलिंडर मोफत देण्याचे आश्वासन दिले आहे . 

कॉलेजला जाणाऱ्या प्रत्येक युवतीला स्कूटी , बारावी उत्तीर्ण झाल्यानंतर २० हजार रुपये , दहावी उत्तीर्ण झाल्यानंतर १५ हजार रुपये , पाचवी आणि आठवी उत्तीर्ण झाल्यानंतर ५ हजार रुपये देण्याचे आश्वासन दिले गेले आहे .