खुशखबर! आता पोलिसांना मिळणार स्वतःच्या मालकीची घरं....
पोलिसांना त्यांच्या हक्काची घरे मिळवून देण्यासाठी नगरविकास विभाग विशेष धोरण तयार करत असल्याचं नगरविकास मंत्री एकनाथ शिंदे यांनी सांगितले आहे.या संदर्भात आज शिंदे यांच्या अध्यक्षतेखाली झालेल्या बैठकीत पोलिसांसाठी विशेष गृहनिर्माण धोरण तयार करण्याला तत्त्वतः मंजुरी देण्यात आली.गृह आणि गृहनिर्माण विभागांच्या समन्वयाने लवकरच अंतिम स्वरूप देऊन मुख्यमंत्री उद्धव ठाकरे यांच्यासमोर मांडले जाणार आहे.सद्यस्थितीत राज्यातील दीड लाख पोलिस हक्काच्या घरापासून वंचित आहेत.त्यांना घरे मिळवून द्यायची असल्यास तेवढ्या मोठ्या संख्येने घरांची निर्मिती करण्याची गरज आहे.यासाठीच शॉर्ट टर्म, मिडीयम टर्म आणि लाँग टर्म अशा तीन टप्प्यात या धोरणाचे स्वरूप तयार करण्यात आले आहे.पोलिसांना सेवा बजावताना लागणारी सेवा निवासस्थाने आणि निवृत्तीनंतर लागणारी निवास्थानांची गरज लक्षात घेऊन योजनेचे अंतिम स्वरूप तयार करण्यात येणार आहे.या बैठकीस गृह विभागाचे अतिरिक्त मुख्य सचिव मनुकुमार श्रीवास्तव, नगरविकास विभागाचे प्रधान सचिव भूषण गगराणी, पोलीस महासंचालक संजय पांडे व अन्य अधिकारी उपस्थित होते.
0 Comments