जमीन खरेदी केल्याचा राग मनात धरून एक जणाने तुला आता जिवंत सोडतच नाही , खलासच करतो अशी धमकी देत महिलेच्या गालावर , कानावर , हातावर , हाताच्या बोटांवर व शरीरावर जिवे ठार मारण्याच्या उद्देषाने कोयत्याने वार करून खुनी हल्ला केला आहे. या हल्ल्यात महिलेच्या डाव्या हातांची २ बोटे तुटली असून ३ बोटे अर्धवट तुटली आहे . गंभीर जखमी झालेल्या या महिलेवर सध्या सोलापूर येथे खाजगी रुग्णालयात अतिदक्षता विभागात उपचार सुरू आहेत .
या प्रकरणी रावसाहेब गोरख करांडे , वय ३५ वर्ष , रा.लक्ष्मीनगर , करांडेवाडी , ता.सांगोला याच्याविरूध्द सांगोला पोलीस ठाण्यात गुन्हा दाखल करण्यात आला आहे . फिर्यादी विष्णु मच्छिंद्र करांडे रा . लक्ष्मीनगर , करांडेवाडी ता.सांगोला यांचे चुलते शंकर कृष्णा करांडे यांनी गावातील महादेव मारूती करांडे यांची २० गुंठे शेत जमीन खरेदी केली होती . शंकर करांडे यांनी महादेव करांडे यांनी जमीन विकत घेतल्यापासून महादेव करांडे यांच्या भावाचा मुलगा रावसाहेब गोरख करांडे यास राग होता . रावसाहेब यास राग असल्याने तो शंकर करांडे व नंदाबाई करांडे यांच्या सोबत मागील काही दिवसांपासून जमीनीच्या वादावरून शाब्दीक भांडण काढत होता .
२१ ऑक्टोबर रोजी सकाळी नऊच्या नंदाबाई करांडे ही घरात स्वयंपाक करत असताना रावसाहेब करांडे हा मोठमोठयाने शिवीगाळ करत नंदाबाई व शंकर यांना घरातून बाहेर काढा , यांना या ठिकाणी राहू द्यायचे नाही असे रागाने बोलू लागला . सदरचे भांडण चालू असताना सरस्वती गोरख करांडे ,गोरख कृष्णा करांडे , जयाबाई करांडे हे त्या ठिकाणी आले . रावसाहेब हा रागारागाने घरात जाऊन शिवीगाळ करत नंदाबाई करांडे यांच्यावर कोयत्याने डाव्या गालावर व कानावर जोरात वार केला . पुन्हा रावसाहेब करांडे याने नंदाबाई यांच्या डाव्या हातावर व बोटांवर वार केल्याने या हल्ल्यात त्यांच्या डाव्या हाताची २ बोटे तुटली असून ३ बोटे अर्धवट तुटली आहेत .
त्यांनतरही रावसाहेब याने नंदाबाई करांडे यांच्या शरीरावर व हातावर कोयत्याने वार करून जिवे ठार मारण्याच्या उदेशाने गंभीर जखमी केले . सदरचे भांडण सोडविण्यासाठी विष्णु करांडे हे गेले असता रावसाहेब याने अंगावर कोयता उगारून फिरवला मात्र त्यांनी वार चुकवल्याने ते बचावले . त्यानंतर रावसाहेब हा कोयता घेऊन धमकी देत निघून गेला . कोयत्याने वार केल्याने गंभीर जखमी झालेल्या नंदाबाई यांना अँम्बुलन्स मधून आणून कोळा , सांगोला या ठिकाणी प्राथमिक उपचार करण्यात आले . मात्र गंभीर जखमी झाल्याने नंदाबाई यांना पुढील उपचारासाठी सोलापूर येथील खाजगी रुग्णालयात दाखल केले आहे . या प्रकरणी विष्णु मच्छिंद्र करांडे यांनी रावसाहेब गोरख करांडे याच्याविरुद्ध सांगोला पोलीस ठाण्यात फिर्याद दिली आहे .
0 Comments