मदरशातील शिक्षणाच्या आड घृणास्पद कृत्य? 10 वर्षीय मुलीवरील अत्याचार प्रकरणाने सोलापूर हादरले
सोलापूर | प्रतिनिधी सोलापूर शहरातील नई जिंदगी परिसरात एका मदरशात शिकणाऱ्या 10 वर्षीय मुलीवर अत्याचार झाल्याचा धक्कादायक प्रकार उघडकीस आला असून, या प्रकरणामुळे संपूर्ण शहरात संतापाची लाट उसळली आहे.
धार्मिक शिक्षण देणाऱ्या संस्थेतच अल्पवयीन मुलीच्या सुरक्षिततेला तडा गेल्याने पालकांमध्ये भीतीचे वातावरण निर्माण झाले आहे.
पोलिसांनी दिलेल्या माहितीनुसार, मदरशाशी संबंधित असलेल्या 53 वर्षीय मौलाना मोहम्मद उमर मोहम्मद हुसेन रजवी (रा. सोलापूर) याच्याविरुद्ध गुन्हा दाखल करण्यात आला आहे.
पीडित मुलीच्या कुटुंबीयांनी दिलेल्या तक्रारीनुसार, आरोपीने मुलीसोबत गैरवर्तन केल्याचा आरोप करण्यात आला आहे. तसेच इतर काही अल्पवयीन मुलींशीही अयोग्य वर्तन केल्याची बाब तक्रारीत नमूद करण्यात आली असल्याचे समजते.
घटनेची माहिती मिळताच मुलीच्या वडिलांनी एमआयडीसी पोलीस ठाण्यात तक्रार दाखल केली. त्यानंतर पोलिसांनी आरोपीविरुद्ध भारतीय न्याय संहितेतील संबंधित कलमे,
पॉक्सो (POCSO) कायद्याअंतर्गत कलम 8, 10 व 12 तसेच बाल न्याय (जेजे) अधिनियम 2015 मधील कलम 75 नुसार गुन्हा नोंदविला आहे.
या घटनेमुळे परिसरातील नागरिक आणि पालकांमध्ये तीव्र नाराजी व्यक्त होत असून, प्रकरणाचा निष्पक्ष व सखोल तपास करून दोषीवर कठोर कारवाई करण्याची मागणी होत आहे.
दरम्यान, एमआयडीसी पोलीस या प्रकरणाचा अधिक तपास करत असून, तपास पूर्ण झाल्यानंतर संपूर्ण सत्य समोर येईल, अशी माहिती पोलीस आयुक्त एम. राज कुमार यांनी दिली.
उपशीर्षक : विश्वासाच्या ठिकाणीच धक्का; अल्पवयीन मुलीच्या सुरक्षेवर प्रश्नचिन्ह, पालकांमध्ये संतापाचे वातावरण
0 Comments