“सोलापूर विधान परिषदेसाठी महिला चेहऱ्याला संधी? सांगोल्यातून राजश्रीताई नागणे पाटील यांच्या नावाची जोरदार चर्चा”

“सोलापूर विधान परिषदेसाठी महिला चेहऱ्याला संधी?

सांगोल्यातून राजश्रीताई नागणे पाटील यांच्या नावाची जोरदार चर्चा”

सांगोला : सोलापूर विधान परिषद निवडणुकीच्या पार्श्वभूमीवर भाजपमध्ये उमेदवारीबाबत मोठ्या हालचाली सुरू असून, यावेळी महिला उमेदवाराला संधी मिळण्याची शक्यता व्यक्त केली जात आहे. 

पक्षाच्या महिला आरक्षण धोरणाला बळ देण्यासाठी सुरक्षित समजल्या जाणाऱ्या जागांवर महिलांना उमेदवारी देण्याचा विचार सुरू असल्याने सांगोल्यातील भाजप नेत्या राजश्रीताई नागणे पाटील यांच्या नावाची जोरदार चर्चा राजकीय वर्तुळात रंगू लागली आहे.

सोलापूर विधान परिषदेसाठी भाजपकडे स्पष्ट संख्याबळ असल्याने ही निवडणूक पक्षासाठी तुलनेने सोपी मानली जात आहे. त्यामुळे पक्षाकडून महिला नेतृत्वाला संधी देण्याबाबत सकारात्मक चर्चा सुरू असल्याचे बोलले जात आहे. 

यामध्ये जिल्हा परिषद सदस्या रश्मीताई बागल, सामाजिक कार्यकर्त्या डॉ. श्रद्धा जवंजाळ आणि भाजपाच्या प्रदेश कार्यकारिणी सदस्या राजश्रीताई नागणे पाटील या तीन प्रमुख नावांची चर्चा सुरू आहे.

यामध्ये सांगोला तालुक्याचे प्रतिनिधित्व करणाऱ्या राजश्रीताई नागणे पाटील यांच्या नावाला स्थानिक कार्यकर्त्यांकडून विशेष पाठिंबा मिळताना दिसत आहे. 

पक्ष संघटनेत सक्रिय भूमिका, महिला संघटनांमध्ये प्रभावी नेतृत्व आणि तळागाळातील जनसंपर्क यामुळे त्यांचे नाव आघाडीवर असल्याचे सांगितले जात आहे.

राजश्रीताईंनी गेल्या काही वर्षांत सांगोला तालुक्यात विविध सामाजिक व विकासात्मक उपक्रम राबवले आहेत. महिलांसाठी मेळावे, बचत गटांना प्रोत्साहन, शेतकऱ्यांच्या पाणी प्रश्नासाठी आक्रमक पाठपुरावा,

 जनावरांच्या चारा छावण्यांमध्ये मदत, विद्यार्थ्यांचा सत्कार, डिजिटल शाळा, धार्मिक-सामाजिक कार्यक्रम तसेच शासकीय योजनांचा लाभ सर्वसामान्यांपर्यंत पोहोचवण्यामध्ये त्यांनी सक्रिय सहभाग घेतला आहे.

दुष्काळी परिस्थितीत पशुपालकांसोबत आंदोलनात सहभाग घेऊन मान नदीला पाणी सोडण्याच्या मागणीसाठी त्यांनी पुढाकार घेतला होता. 

तसेच शेतकऱ्यांच्या प्रश्नांसाठी अधिकाऱ्यांशी थेट संपर्क साधून अनेक प्रश्न मार्गी लावल्याचे कार्यकर्ते सांगतात. कोरोना काळातही त्यांनी नागरिकांना मदतीचा हात दिला होता.

दरम्यान, विधान परिषदेसाठी भाजपमधून माजी आमदार प्रशांत परिचारक, राजेंद्र राऊत, विक्रम देशमुख, शिवाजीराव सावंत, रणजितसिंह मोहिते पाटील आणि भाऊसाहेब रूपनर यांचीही नावे चर्चेत आहेत.

 मात्र अंतिम निर्णय मुख्यमंत्री Devendra Fadnavis आणि पालकमंत्री Jaykumar Gore यांच्या स्तरावर होणार असल्याचे समजते.

उमेदवारी अर्ज दाखल करण्यासाठी कमी कालावधी शिल्लक असताना कोणाच्या नावावर शिक्कामोर्तब होणार याकडे संपूर्ण जिल्ह्याचे लक्ष लागले आहे. 

मात्र सांगोला तालुक्यातून “यावेळी महिला नेतृत्वाला संधी द्यावी आणि राजश्रीताई नागणे पाटील यांना विधान परिषदेत पाठवावे,” अशी मागणी भाजप कार्यकर्ते आणि समर्थकांकडून जोर धरत आहे.