दारूच्या नशेत वादातून चुलत भावाचा मृत्यू; जत तालुक्यातील भिवर्गीतील धक्कादायक घटना

दारूच्या नशेत वादातून चुलत भावाचा मृत्यू; जत तालुक्यातील भिवर्गीतील धक्कादायक घटना

सांगली जिल्ह्यातील जत तालुक्यातील भिवर्गी येथे दारूच्या नशेत झालेल्या वादातून चुलत भावाचा खून झाल्याची गंभीर घटना समोर आली आहे.

 गौडर वस्ती परिसरात घडलेल्या या प्रकारामुळे गावात खळबळ उडाली आहे.

मिळालेल्या माहितीनुसार, महादेव बिरादार (वय 26) आणि त्याचा चुलत भाऊ यांच्यात मस्करीदरम्यान किरकोळ वाद निर्माण झाला. 

हा वाद वाढत जाऊन हाणामारीपर्यंत गेला. या वेळी आरोपीने महादेवच्या डोक्यावर जोरदार मारहाण केली आणि त्याचा गळा दाबल्याचा आरोप आहे. गंभीर जखमी झाल्याने महादेव बेशुद्ध पडला.

घटनेनंतर उपस्थितांनी तातडीने कुटुंबीयांना माहिती दिली. त्यानंतर महादेवला जत ग्रामीण रुग्णालयात दाखल करण्यात आले. 

मात्र, डॉक्टरांनी तपासणीनंतर त्याला मृत घोषित केले. मृतदेह पुढील तपासणीसाठी मिरज येथील शासकीय रुग्णालयात पाठविण्यात आला आहे.

या प्रकरणी उमदी पोलीस ठाण्यात गुन्हा दाखल करण्यात आला असून संशयित सिलिसिद्ध मल्लाप्पा बिरादार याला पोलिसांनी ताब्यात घेतले आहे. 

घटनेचा सविस्तर तपास सुरू असून मृत्यूचे नेमके कारण शवविच्छेदन अहवालानंतर स्पष्ट होणार आहे.

ही घटना मारहाणीतून घडली की अन्य कारणातून, याबाबत पोलीस अधिक चौकशी करत आहेत.