सांगोला पोलिसांची ‘मिशन सुरक्षितता’ मोहीम यशस्वी! 100 हरवलेल्या महिलांचा शोध; नागरिकांत वाढला विश्वास
(शब्दरेखा एक्स्प्रेस न्युज संपादक संतोष साठे ९५०३४८७८१२)
सांगोला : समाजातील संवेदनशील प्रश्नांवर ठोस पावले उचलत सांगोला पोलीस ठाण्याने एक उल्लेखनीय कामगिरी बजावली आहे.
पोलीस निरीक्षक विनोद घुगे यांच्या प्रभावी नेतृत्वाखाली राबविण्यात आलेल्या विशेष मोहिमेत तब्बल 100 हरवलेल्या महिलांचा शोध घेण्यात यश आले असून, या कामगिरीमुळे अनेक कुटुंबांना दिलासा मिळाला आहे.
गेल्या वर्षभरात हरवलेल्या महिलांसोबतच 6 मुलींचा आणि स्वतंत्रपणे 10 अल्पवयीन मुलींचा शोध घेऊन त्यांना सुरक्षितपणे त्यांच्या कुटुंबीयांकडे सुपूर्द करण्यात आले.
या यशस्वी कारवाईमुळे सांगोला पोलिसांची कार्यक्षमता आणि सामाजिक बांधिलकी अधोरेखित झाली आहे.
या मोहिमेत पोलीस उपनिरीक्षक स्नेहल चव्हाण आणि पोलीस शिपाई अमोल कुंभार यांनी विशेष परिश्रम घेतले. तांत्रिक साधनांचा वापर, स्थानिक नेटवर्कचा आधार आणि सातत्यपूर्ण शोधमोहीम यांच्या जोरावर त्यांनी गुंतागुंतीची प्रकरणेही अल्पावधीत मार्गी लावली.
दरम्यान, गेल्या तीन महिन्यांत अपहरणाच्या 6 प्रकरणांचा छडा लावणे हे मोठे आव्हान होते. मात्र, नियोजनबद्ध तपास आणि वेगवान हालचालींमुळे सर्व अपहरित मुलांना सुरक्षितपणे परत आणण्यात पोलिसांना यश मिळाले.
विशेष म्हणजे, यापैकी 3 प्रकरणांचा तपास स्नेहल चव्हाण यांनी स्वतः हाताळला, ही बाब कौतुकास्पद ठरली आहे.
पोलीस निरीक्षक विनोद घुगे यांच्या नेतृत्वामुळे सांगोला पोलिसांची प्रतिमा अधिक सक्षम आणि विश्वासार्ह बनत असून, कायदा-सुव्यवस्थेबरोबरच सामाजिक जबाबदारी पार पाडण्यातही पोलीस दल पुढे असल्याचे स्पष्ट झाले आहे.
विद्यार्थ्यांना संदेश :
यावेळी विद्यार्थ्यांशी संवाद साधताना विनोद घुगे यांनी शिक्षणाचे महत्त्व अधोरेखित केले. “मोबाईलचा अतिरेकी वापर टाळा, चुकीच्या सवयींपासून दूर रहा आणि आई-वडिलांच्या कष्टाची जाणीव ठेवून आयुष्यात यश मिळवा,” असा संदेश त्यांनी दिला.
सांगोला पोलिसांच्या या ‘मिशन सुरक्षितता’मुळे नागरिकांमध्ये सुरक्षिततेची भावना अधिक बळकट झाली असून, पोलीस दलाबद्दलचा विश्वास लक्षणीयरीत्या वाढला आहे.
0 Comments