सांगोला बाजार समितीवर शेकापचे वर्चस्व शेकापने आघाडी करून निवडणूक लढविली; मात्र कोणतेही पद मित्रपक्षांना दिले नाही

 सांगोला बाजार समितीवर शेकापचे वर्चस्व शेकापने आघाडी करून निवडणूक लढविली; मात्र कोणतेही पद मित्रपक्षांना दिले नाही

सांगोला : (शब्दरेखा एक्सप्रेस न्यूज नेटवर्क)

सांगोला तालुका कृषी उत्पन्न बाजार समितीच्या सभापतीपदासाठी सत्ताधारी शेकापकडून समाधान पाटील व उपसभापतीपदी माणिकचंद वाघमारे यांची बिनविरोध झाली. पण निवडणुकीच्या वेळी शेकाप, शिवसेना शिंदे गट, राष्ट्रवादी काँग्रेस, काँग्रेस व भाजप यांच्या आघाडीतून एकतर्फी सत्ता मिळवली होती. पण सभापती व उपसभापतीच्या निवडीत शेकापने बाजी मारल्याने मित्रपक्ष नाराज झाले आहेत.

सांगोला तालुक्याचे लक्ष लागून राहिलेल्या सांगोला तालुका कृषी उत्पन्न बाजार समिती संचालक मंडळाच्या १८ जागांसाठी अर्ज माघारी घेण्याच्या शेवटच्या दिवशी २ जागा बिनविरोध झाल्या होत्या. उर्वरित १६ जागांसाठी झालेल्यानिवडणुकीत सत्ताधारी शेकाप, राष्ट्रवादी काँग्रेस, शिवसेना (शिंदे गट), काँग्रेस (आय) भाजप व आनंद माने गट प्रणित 

सांगोला तालुका शेतकरी विकास आघाडीने सर्वच्या सर्व १६ जागा जिंकून अपेक्षेप्रमाणे एकतर्फी दणदणीत विजय मिळवला. या निवडणुकीत स्व. गणपतराव देशमुख यांच्या परिवर्तन महाविकास आघाडीसह अपक्षांना दारुण पराभव झाला. दरम्यान, निवडणुकीपूर्वी शिवसेनेचे आमदार शहाजी पाटील व राष्ट्रवादी कॉंग्रेसचे माजी आमदार दीपक साळुंखे-पाटील, भाजपचे तालुकाध्यक्ष चेतनसिंह केदारयांच्यासमवेत शेकापचे चंद्रकांत देशमुख,

 डॉ. बाबासाहेब देशमुख, बाळासाहेब एरंडे व मारुती बनकर यांच्यात जागा वाटपाबाबत बैठक झाली होती. यामध्ये जागा वाटपाच्या फॉर्म्युल्यानुसार १८ जागांपैकी १२ जागा सत्ताधारी शेकापला, तर राष्ट्रवादी काँग्रेस पार्टी, शिवसेना शिंदे गट, भाजप यांच्या गटाला ६ जागामिळाल्या आहेत. त्यामुळे आपसुकच बाजार समितीवर शेकापचे वर्चस्व आहे. मात्र

सभापतीपदासाठी इच्छुक असलेले बाळासाहेब काटकर, हेमंतकुमार शिंदे, गणेश गोडसे, विनायक कुलकर्णी, संतोष देवकाते, समाधान पाटील, अमोल खरात यांच्या नावांची चर्चा झाली होती. सभापती व उपसभापती यांची निवड करण्यासाठी शेतकरी कामगार पक्षाने तालुक्यातील जिल्हा परिषदेच्या सर्व गटांच्या कार्यकर्त्यांच्या बैठका घेतल्या. त्यांचे विचार ऐकून घेतले.

या बैठकांमध्ये डॉ. बाबासाहेब देशमुख, चंद्रकांत देशमुख व तालुका चिटणीस दादासो बाबर यांना

सभापती व उपसभापती यांच्या निवडीबाबतचे सर्व अधिकार देण्यात आले होते. या कमिटीने तालुक्यातील सर्व कार्यकत्यांशी चर्चा करुन अखेर सभापतीपदासाठी समाधान पाटील व उपसभापतीपदासाठी माणिकचंद वाघमारे यांची नावे जाहीर केली.त्यांच्या निवडीही बिनविरोध पार पडल्या.पण निवडणुकीच्या वेळी शिवसेना शिंदे गट, राष्ट्रवादी काँग्रेस, काँग्रेस, भाजप यांना या निवडीमध्ये सहभाग घेतला नाही. यामुळे ते नाराज झाले आहेत.

मित्रपक्षांत नाराजी

सांगोल्यातील अनेक सहकारी संस्थांवर शेकापाचे एकहत्ती वर्चस्व आहे. शेतकरी सहकारी सूत गिरणी व खरेदी-विक्री संघाची निवडणूक बिनविरोध करण्यासाठी आजी-माजी लोकप्रतिनिधी यांनी मदत केली, हेही शेकापला विसरुन चालणार नाही. त्यामुळे सांगोला तालुका कृषी उत्पन्न बाजार समितीचे उपसभापतीपद आमदार शहाजी पाटील व माजी आमदार दीपक साळुंखे-पाटील यांच्या गटाला मिळावे, अशी कार्यकर्त्यांची मागणी होती. पण शेकापने याकडे दुर्लक्ष केले. यामुळे आघाडी होऊन निवडणुका लढवल्या, पण कोणतेही पद मिळाले नसल्याने मित्रपक्षांमध्ये नाराजी पसरली आहे..