मित्राच्या मदतीने लहान भावाने सख्या मोठ्या भावाचा खून
केल्याची उघडकीस आली आहे. यातील आरोपींना पोलिसांनी अटकही केली आहे.
कुटुंबीयांचा सतत छळ करणाऱ्या सख्ख्या भावाचा दुसऱ्या भावाने आपल्या मित्राच्या मदतीने खून केल्याची घटना लातूरमधील भातखेडा गावात घडली आहे. सुरज गोविंद मुळे वय 25 असे हत्या झालेल्या तरुणाचे नाव आहे. तर यातील आरोपीचे नाव धीरज गोविंद मुळे असे आहे. सुरज हा आपली आई, बहीण, भावाला दारू पिऊन सतत छळत असे.
दरम्यान त्याच्या या त्रासाला कंटाळून त्याचा भाऊ धीरज हा आपली आई व बहिणीला घेऊन पुण्याला निघून गेला. तिथे धीरजला एक नोकरी मिळाली. मात्र आपला दारुडा भाऊ सतत आपल्याला छळत असल्याचा राग त्याच्या मनात कायम होता.
याच रागातून सुरजचा काटा काढण्याचा निर्णय धीरजने घेतला. यासाठी त्याने गावातील आपला मित्र अमर गायकवाड वय 22 याची मदत घेतली. आपल्या भावावर पाळत ठेवण्याची जबाबदारी अमर याच्यावर सोपविली. ठरल्याप्रमाणे धीरज हा आपल्या गावी आला.
सुरज घरात झोपलेला होता. हीच संधी साधून धीरज व त्याच्या मित्राने सुरजच्या डोक्यात गोळी झाडली. या घटनेत सुरजचा जागीच मृत्यू झाला. मात्र हत्या करून धीरज हा रातोरात पुण्याला निसटला. या घटनेची माहिती मिळताच पोलिसांनी घटनास्थळी धाव घेतली.
दरम्यान या प्रकरणाचा तपास सुरू असताना धीरजवर पोलिसांचा संशय वाढला. त्या दृष्टिकोनातून पोलिसांनी तपास सुरू केला. घटना ज्या दिवशी घडली त्या दिवशी धीरज कुठे होता, याचा तपास पोलीस प्रशासनाने केला. स्वतःचे लग्न जमविण्यासाठी गावाकडे जायचे आहे, असे खोटे सांगून धीरजने रजा घेतली होती.
याची माहिती पोलिसांना मिळाल्यानंतर त्यांनी लगेच धीरजला अटक केली. पोलिसी खाक्या दाखविताच धीरजने आपला गुन्हा कबूल केला. आपला भाऊ सतत दारू पिऊन कुटुंबीयांना त्रास देत होता. त्याच्या या त्रासाला कंटाळूनच आपण ही हत्या केल्याची माहिती धीरजने पोलिसांना दिली.
0 Comments