मल्लिकार्जुन खर्गे यांच्या रुपात काँग्रेस पक्षाला मिळाला दमदार राष्ट्रीय अध्यक्ष

 मल्लिकार्जुन खर्गे यांच्या रुपात काँग्रेस पक्षाला मिळाला दमदार राष्ट्रीय अध्यक्ष

काँग्रेसचे ज्येष्ठ नेते मल्लिकार्जुन खर्गे यांची पक्षाच्या नवीन राष्ट्रीय अध्यक्षपदी निवड करण्यात आली आहे. तब्बल 24 वर्षांनंतर गांधी घराण्याबाहेरील एका नेत्याची देशातील सर्वात जुन्या पक्षाच्या अध्यक्षपदी निवड झाली. काँग्रेस अध्यक्षपदासाठी 17 ऑक्टोबर रोजी मतदान झाले होते. यावेळी पक्षाचे ज्येष्ठ नेते मल्लिकार्जुन खर्गे आणि शशी थरूर यांच्यात लढत होती. त्यापैकी मल्लिकार्जुन खर्गे यांना शशी थरूर यांचा पराभव करण्यात यश आले.

मल्लिकार्जुन खर्गे यांना 7,897 मते मिळाली, तर शशी थरूर यांना 1,072 मते मिळाली. 17 ऑक्टोबर 2022 रोजी विविध राज्यांमध्ये स्थापन केलेल्या मतदान केंद्रांवर काँग्रेस अध्यक्षपदासाठी मतदान झाले. मतदान प्रक्रियेत 9500 हून अधिक प्रतिनिधींनी भाग घेतला. काँग्रेसच्या निवडणूक अधिकाऱ्यांनी 96 टक्के मतदान झाल्याचा दावा केला होता.

काँग्रेसच्या 137 वर्षाच्या इतिहासात सहाव्यांदा अध्यक्षपदासाठी निवडणूक झाली आहे. या दोन्ही उमेदवारांचे आणि काँग्रेस पक्षाचे भवितव्य सोमवारी मतपेट्यांमध्ये बंद झाले होते. अध्यक्षपद निवडणुकीसाठी जवळपास 96 टक्के मतदान झालं होतं. 24 अकबर रोड येथील काँग्रेस मुख्यालयात सकाळी दहा वाजेपासून मतमोजणीला सुरूवात झाली होती.

अध्यक्षांची मागणी होताना अध्यक्ष गांधी घराण्यातीलच व्हावा अशी अनेकांची इच्छा होती, मात्र राहुल गांधींचा अध्यक्षपद स्वीकारण्यासाठीचा नकार, सोनिया गांधी यांची खालावलेली तब्येत आणि प्रियांका गांधी वड्रा यांच्या हाती फारसं यश न लागणं यासर्व गोष्टींमुळे ‘नॉन-गांधी’ हाच एक पर्याय पक्षाकडे राहिला होता.