सर्व जिल्ह्यांत हजारपेक्षा जास्त तलाठी पदांसाठी महिनाअखेरीस परीक्षा

सर्व जिल्ह्यांत हजारपेक्षा जास्त तलाठी पदांसाठी महिनाअखेरीस परीक्षा

 मुंबई : सामान्य प्रशासन विभागाकडून मुंबई व उपनगर वगळता राज्यातील सर्व जिल्ह्यांतून जिल्हाधिकाऱ्यांमार्फत तलाठी पदाची परीक्षा हजारपेक्षा जास्त पदांसाठी घेण्यात येणार आहे . यासंदर्भात महिनाअखेरीस जाहिरात निघेल . ही परीक्षा ऑनलाइन घेण्यात येणार असल्याची माहिती सामान्य प्रशासन विभागातील सूत्रांनी दिली .

 राज्याच्या अर्थकारणाचा कणा असणाऱ्या महसूलविभागात तलाठी हे महत्त्वाचे पद असून महसूल विभागाचा पाया असल्याचे समजले जाते . मात्र राज्यात तलाठ्यांच्या जागा मोठ्या प्रमाणात रिक्त असल्याने महसूल यंत्रणेवर पडणारा ताण लक्षात घेऊन ३,१६५ तलाठी पदे भरण्यासाठी मंत्रिमंडळाने मंजुरी दिली होती . 

पहिल्या टप्प्यात हजारपेक्षा जास्त तलाठ्यांची भरती करण्याबाबत महसूल मंत्री बाळासाहेब थोरात विधानसभेत सूतोवाच केले होते . त्यानुसार सामान्यप्रशासन विभागाकडून मुंबई व उपनगर वगळता राज्यातील सर्व जिल्ह्यांतून जिल्हाधिकाऱ्यांमार्फत तलाठी पदाची परीक्षा हजारपेक्षा जास्त पदांसाठी घेण्यात येणार आहे . 

या माहितीनुसार , तलाठी गट क संवर्गाची रिक्त असलेली सर्व महसुली विभाग मिळून राज्यातील एकूण १,०१२ रिक्त पदे भरण्यास शासनाने यापूर्वीच मान्यता दिली आहे . सन २०२२ ची तलाठी पदभरतीची कार्यपद्धती स्वतंत्र पणे लवकरच कळवण्यात येईल .