सोलापूरकरांनों ‘इलेक्ट्रिकल वाहन’ बघायचे आहे का? मग या फडकुले सभागृहाच्या प्रांगणात

 सोलापूरकरांनों 'इलेक्ट्रिकल वाहन' बघायचे आहे का? मग या फडकुले सभागृहाच्या प्रांगणात - सिंहासन

सोलापूरकरांनों ‘इलेक्ट्रिकल वाहन’ बघायचे आहे का? मग या फडकुले सभागृहाच्या प्रांगणात

सोलापूर : जागतिक हवामान दिनाच्या निमित्ताने माझी वसुंधरा अभियान व राष्ट्रीय स्वच्छ वायू उपक्रम अंतर्गत सोलापूर महानगरपालिका पर्यावरण विभाग आणि इको फ्रेंडली क्लब यांच्यावतीने सोलापुरात पहिल्यांदाच इलेक्ट्रिक व्हेईकलचे प्रदर्शन भरविण्यात आले आहे. शनिवारी जिल्हाधिकारी मिलिंद शंभरकर यांच्या हस्ते प्रदर्शनाचे उद्घाटन करण्यात आले.

सोलापूर महानगरपालिकेचे उपायुक्त धनराज पांडे यांनी उद्घाटन कार्यक्रमाप्रसंगी प्रास्ताविक केले. माझी वसुंधरा अभियान अंतर्गत सोलापुरात विविध उपक्रम राबविले जात आहेत. इलेक्ट्रिक व्हेईकलला प्रोत्साहन देण्याचा निर्णय सोलापूर महानगरपालिकेने घेतला आहे. याच अनुषंगाने शहरात विविध ठिकाणी चार्जिंग पॉईंट चालू करण्यात येत आहेत, असेही पांडे यांनी यावेळी सांगितले.

सोलापूर प्रदूषण मुक्त करण्यासाठी अधिकाधिक लोकांनी इलेक्ट्रिक व्हेईकलचा वापर करावा असे आवाहन करुन जिल्हाधिकारी मिलिंद शंभरकर म्हणाले, ‘माझी वसुंधरा अभियानांतर्गत विविध उपक्रम सोलापुरात राबवले जात आहेत, यामुळे पर्यावरण संवर्धन चळवळीला गती आली आहे. पेट्रोल डिझेलमुळे होणारे प्रदूषण कमी करण्यासाठी सर्वांनी इलेक्ट्रिक व्हेईकलचा वापर करावा.’

महापालिका आयुक्त पी. शिवशंकर यांच्या मार्गदर्शनाखाली डॉ. निर्मलकुमार फडकुले सभागृहाच्या प्रांगणात भरवण्यात आलेले हे प्रदर्शन 28 मार्चपर्यंत सकाळी 10 ते रात्री 9 या वेळेत सर्वांसाठी खुले आहे. या प्रदर्शनात नीदा इव्ही, राज मोटर्स, डायनामिक इव्ही मोटर्स, मोंढे यो बाइक, चकोले मोटर्स या कंपन्यांचे इलेक्ट्रिक व्हेईकल सोलापूरकरांना प्रत्यक्ष पाहता येत आहेत. कंपनीच्या प्रतिनिधींकडून इलेक्ट्रिक व्हेईकलची माहिती दिली जात आहे.

याप्रसंगी सोलापूर महानगरपालिकेचे ब्रँड अँबेसिडर चित्रकार सचिन खरात, महानगरपालिकेचे पर्यावरण अधिकारी स्वप्निल सोलनकर, इलेक्ट्रिक व्हेईकल डीलर्सचे श्रीनिवास चकोले, बसवराज येरनाळे, सलीम हुंडेकरी, पवन मोंढे, इको फ्रेंडली क्लबचे समन्वयक अजित कोकणे, सोलापूर महानगरपालिकेचे मुख्य सफाई अधीक्षक अनिल चराटे, सफाई अधीक्षक नागनाथ बिराजदार, सफाई अधीक्षक (वाहन) नागेश मेंडगुळे, सुधाकर नागटिळक, सूर्यकांत लोखंडे, आरोग्य निरीक्षक श्री. सातपुते उपस्थित होते.

इलेक्ट्रिक व्हेईकल रॅलीला प्रतिसाद

इलेक्ट्रिक व्हेईकल प्रदर्शनाच्या निमित्ताने शनिवारी उद्घाटनानंतर शहरातील प्रमुख रस्त्यावरून इलेक्ट्रिक व्हेईकलची रॅली काढण्यात आली. जिल्हाधिकारी मिलिंद शंभरकर, उपायुक्त धनराज पांडे, ब्रँड अँबेसिडर सचिन खरात यांच्यासह मान्यवरांनी या रॅलीमध्ये सहभाग नोंदवला.

अधिकाऱ्यांनी खरेदी केली इलेक्ट्रिक व्हेईकल

सोलापूर महानगरपालिकेचे पर्यावरण अधिकारी स्वप्निल सोलनकर, सफाई अधीक्षक नागनाथ बिराजदार यांनी इलेक्ट्रिक व्हेईकल प्रदर्शनाच्या पहिल्याच दिवशी स्वतःसाठी इलेक्ट्रिक व्हेईकल खरेदी केली. जिल्हाधिकारी मिलिंद शंभरकर यांच्या हस्ते सोलनकर आणि बिराजदार यांना इलेक्ट्रिक व्हेईकलच्या सुपूर्द करण्यात आल्या.