राज्यातील बांधकाम कामगारांसाठी तीन नव्या योजनांना मंजुरी

 राज्यातील बांधकाम कामगारांसाठी तीन नव्या योजनांना मंजुरी

राज्यातील बांधकाम कामगारांसाठी तीन नव्या कल्याणकारी योजनांची घोषणा कामगार विभागामार्फत करण्यात आली आहे. महाराष्ट्र इमारत व इतर बांधकाम कामगार कल्याणकारी मंडळाकडे नोंदणीकृत असणाऱ्या सर्व बांधकाम कामगारांना या योजनांचा लाभ होणार आहे. बांधकाम कामगारांच्या मुलीच्या लग्नासाठी अर्थसाहाय्य, कामगाराचा मृत्यू आणि अपघात याबाबतच्या या तीन योजना असून, या योजनांची अंमलबजावणी करण्याची सूचना बांधकाममंत्री हसन मुश्रीफ यांनी दिली आहे.

बांधकाम विभागातर्फे करण्यात आलेल्या घोषणांनुसार नोंदणीकृत बांधकाम कामगाराला एका मुलीच्या लग्नासाठी 51 हजार रुपयांचे अर्थसाहाय्य करण्यात येणार आहे. बांधकाम कामगाराचा अपघाती वा नैसर्गिक मृत्यू झाला तर त्याचे पार्थिव त्याच्या मूळ गावी पाठविण्यासाठी लागणारा खर्च मंडळाकडून केला जाणार आहे. बांधकाम कामगाराचा हात वा पाय निकामी झाल्यास कृत्रिम हात वा पाय बसविण्याच्या शस्त्रक्रियेचा खर्चदेखील मंडळाकडून केला जाणार आहे.

 बांधकाम कामगार कल्याणकारी मंडळाकडे नोंदित कामगारांसाठी सध्या विविध प्रकारच्या 29 योजना राबविण्यात येत आहेत. त्यांमध्ये शैक्षणिक साहाय्य, सामाजिक, सुरक्षेसंबंधी, आरोग्यविषयक आणि अर्थसाहाय्याच्या योजनांच्या समावेश आहे. या योजनांमध्ये आता आणखी तीन योजनांची भर पडली आहे.

कामगारांची सोय लक्षात घेऊन मंडळाने जुलै 2020पासूनच ऑनलाइन पद्धतीने नोंदणी, नूतनीकरण आणि लाभवाटपाची प्रक्रिया सुरू केली आहे. बांधकाम कामगार ‘www.mahabocw.in’ या संकेतस्थळावर ऑनलाइन पद्धतीने नोंदणी करू शकतात. त्याशिवाय याच संकेतस्थळावर नूतनीकरण आणि विविध योजनांचा लाभ घेण्याची सुविधा उपलब्ध करून देण्यात आली आहे.

 

लोकप्रिय योजना : मंडळामार्फत कोरोना कालावधीत राज्यात मध्यान्ह भोजनासह रात्रीचे भोजन वितरित करण्यात येत आहे. ही योजना कोरोना कालावधीत फार उपयुक्त ठरल्यामुळे कामगारांमध्ये लोकप्रिय झाली आहे. 

या योजनेमुळे कोरोनाकाळात होणाऱ्या स्थलांतराचे प्रमाण कमी झाले आहे. मध्यान्ह भोजन योजना राबविल्याबाबत कामगार व कामगार संघटनांकडून मंडळाचे अभिनंदन होत आहे. बांधकाम कामगारांकरिता नव्याने घोषित तीन योजनांची तातडीने अंमलबजावणी करण्याचेही निर्देश कामगारमंत्री हसन मुश्रीफ यांनी मंडळाला दिले आहेत.

  

उपकर निधीतून कल्याणकारी योजना : मंडळाकडे जमा होत असलेल्या उपकर निधीमधून मंडळामार्फत बांधकाम कामगारांच्या पाल्यांकरिता इयत्ता पहिलीपासून पदव्युत्तर शिक्षणापर्यंत अर्थसाहाय्य करण्यात येते. याशिवाय अभियांत्रिकी व वैद्यकीय शिक्षणासाठी विशेष साहाय्य, 

बांधकाम कामगारांचा नैसर्गिक वा अपघाती मृत्यू झाल्यास अर्थसाहाय्य, बांधकाम कामगारांच्या घरांकरिता अर्थसाहाय्य, बांधकाम कामगारांची प्रसूती, तसेच गंभीर आजारांकरिता अर्थसाहाय्य अशा एकूण 29 कल्याणकारी योजनांचा लाभ थेट बांधकाम कामगारांच्या बँक खात्यामध्ये जमा करण्यात येतो. बांधकाम कामगारांना सुरक्षा संच व अत्यावश्यक संचाचे वाटपही करण्यात येत आहे.