प्रॉपर्टीसाठी पोटच्या मुलीने केली आईची हत्या:जाणून घ्या सविस्तर माहिती…
दिल्ली: एका मुलीने आपल्या मित्राच्या मदतीने स्वत:च्या आईची हत्या केल्याची माहिती समोर आली असून या हत्याकांडामागे संपत्तीचा वाद कारणीभूत असल्याची माहिती समोर येत आहे. आईने संपत्तीचा वाटा देणार नाही अशी धमकी दिल्याने हत्या करण्यात आल्याची उघड झाले आहे. आंबेडकर नगर पोलीस स्थानकाच्या हद्दीत हा प्रकार घडला असून या मुलीने गळा चिरुन आईची हत्या केली.
पोलीस तपासामध्ये या महिलेची हत्या तिच्या मुलीनेच एका मित्राच्या मदतीने केली असल्याचे समोर आले. पोलिसांनी त्यानंतर या दोघांना अटक केली आहे. पोलीस घटनास्थळी पोहचले तेव्हा त्यांना सुधा राणी यांचा मृतदेह बेडवर रक्ताच्या थारोळ्यात पडलेला आढळून आला.
त्यांच्या गळ्यावर धारधार हत्याराने वार करण्यात आल्याचे दिसत होते. पोलिसांनी सुधा राणी यांची मुलगी देवयानीची चौकशी केली. मास्क लावलेले काही लोक घरात शिरले आणि त्यांनी आईला धमकी देत पैसे चोरण्याचा प्रयत्न केला. त्यावेळी आईने विरोध केला असता त्यांनी आईच्या गळ्यावर वार करुन चोरी करुन पळ काढल्याची माहिती देवयानीने पोलिसांना घडलेला घटनाक्रम सांगताना दिली.
मात्र पोलिसांनी घटनास्थळाची पाहणी केली असता त्यांना चोरी आणि लूटमार झाल्याचे कोणतेही पुरावे आढळून आले नाहीत. मृतमहिलेच्या अंगावरील सोनसाखळी आणि बोटांमधील अंगठी तशीच होती. त्यामुळे पोलिसांना मुलीने दिलेल्या जबाबावर विश्वास बसला नाही. त्यांनी देवयानीची चौकशी केली असता तिने गुन्हा कबूल केला. देवयानीचे ग्रेटर नोएडामधील एका व्यक्तीशी लग्न झाले होते. तिला चार वर्षांचा मुलगाही आहे.
मात्र लग्नानंतर मुलगा झाल्यावर पतीसोबतच्या सततच्या भांडणांना वैतागून देवयानीने घर सोडले होते आणि ती तिच्या एका मित्रासोबत राहू लागली. मात्र तिची आई नेहमी तिला पतीच्या घरी परत जाण्यास सांगत होती. पतीच्या घरी परत गेली नाहीस तर संपत्तीचा वाटा मिळणार नाही अशी धमकी ती नेहमी देवयानीला द्यायची. याच धमक्यांमुळे देवयानीने तिची हत्या केल्याचे सांगितले आहे.
देवयानीने तिच्या कार्तिक चौहान नावाच्या मित्राच्या मदतीने आईचा हत्येचा कट रचला. हत्येच्या दिवशी काय घडले याबद्दल सांगताना देवयानीने, “आपण सर्वांसाठी चहा केला. मात्र आईचा चहा देण्याआधी मी त्यामध्ये झोपेच्या गोळ्या टाकल्या,” असे पोलिसांना सांगितले. त्यानंतर देवयानीने कार्तिकला फोन करुन घरी बोलवून घेतले.
सुधा राणी यांना झोपेच्या गोळ्यांमुळे गुंगी आलेली असल्याने त्या झोपेत असतानाच कार्तिकने सर्जिकल ब्लेडने देवयानीसमोरच सुधा यांचा गळा चिरला. चोरीच्या उद्देशाने ही हत्या झाल्याचा बनाव करण्यासाठी देवयानीने घरातील सर्व दागिणे कार्तिकला दिले. पोलिसांनी या दोघांना अटक केली असून पोलिसांनी सर्व ऐवज जप्त केला आहे.
0 Comments