कोविशिल्ड, कोवॅक्सिन लस लवकरच बाजारात मिळणार, ‘ही’ असेल किंमत !

 कोविशिल्ड, कोवॅक्सिन लस लवकरच बाजारात मिळणार, ‘ही’ असेल किंमत !

देशातील कोविशिल्ड आणि कोवॅक्सिन या करोनावरील लसी लवकरच बाजारात येण्याची अपेक्षा आहे. या लसींना औषध नियामकाकडून नियमित बाजारात विक्रीसाठी लवकरच मंजुरी मिळू शकते, असे अधिकृत सूत्रांनी सांगितले.

या लसींची किंमत प्रति डोस २७५ रुपये असू शकते. यासोबतच १५० रुपये अतिरिक्त सेवा शुल्क असण्याची शक्यता आहे. करोनावरील लस परवडणाऱ्या दरात उपलब्ध करून देण्याच्या दिशेने काम करण्याचे निर्देश नॅशनल फार्मास्युटिकल प्राइसिंग अथॉरिटी (NPPA) ला देण्यात आले आहेत.

आतापर्यंत खासगी रुग्णालयांमध्ये कोवॅक्सिनची किंमत प्रति डोस १,२०० रुपये आणि कोविशील्डची किंमत प्रति डोस ७८० रुपये निश्चित करण्यात आली आहे.

या किमतींमध्ये १५० रुपये सेवा शुल्काचा समावेश आहे. या दोन्ही लसी देशात आपत्कालीन वापरासाठी अधिकृत आहेत. Covishield आणि Covaxin या लसी काही अटींसह प्रौढांसाठी नियमितपणे विक्री करण्यास मंजुरी देण्याची शिफारस केंद्रीय औषध मानक नियंत्रण संस्थेच्या COVID-19 वरील तज्ज्ञ समितीने १९ जानेवारीला केली होती.

करोनावरील लस स्वस्त दरात उपलब्ध करून देण्याच्या दिशेने काम करण्याची सूचना NPPA ला देण्यात आली आहे. लसीची किंमत प्रति डोस २७५ रुपये आणि १५० रुपये अतिरिक्त सेवा शुल्कापर्यंत मर्यादित असण्याची शक्यता आहे,

अशी माहिती एका अधिकृत सूत्राने दिली. भारताच्या ड्रग्ज कंट्रोलर जनरल यांना कोविडशिल्ड लस नियमित बाजारात लाँच करण्यासाठी मंजुरी मागणारा अर्ज कंपनीने २५ ऑक्टोबरला सादर केला होता,

अशी माहिती सीरम इन्स्टिट्यूट ऑफ इंडियाचे संचालक (सरकारी आणि नियामक व्यवहार) प्रकाश कुमार सिंह यांनी दिली.