महाराष्ट्रात प्रत्येक जिल्हा काँग्रेस कमिटीत महिला कार्याध्यक्ष नियुक्त करणार

 महाराष्ट्रात प्रत्येक जिल्हा काँग्रेस कमिटीत महिला कार्याध्यक्ष नियुक्त करणार

प्रियंका गांधी यांनी उत्तर प्रदेशात राबवलेल्या ‘लडकी हूँ, लड सकती हूँ’ अभियानाला महाराष्ट्रातून बळ देत राज्यातील प्रत्येक जिल्हा काँग्रेस कमिटीत एक महिला कार्याध्यक्ष नियुक्त करण्याचा निर्णय काँग्रेसने घेतला आहे. काँग्रेसचे प्रदेशाध्यक्ष नाना पटोले यांनी ही घोषणा केली.

काँग्रेसने महिलांचा कायमच सन्मान करत त्यांना समान संधी दिली आहे. पंतप्रधान, राष्ट्रपती, राज्यपाल या महत्वाच्या पदावर काँग्रेसने महिलांना संधी दिली आहे. महिलांना राजकारणात महत्वाची जबाबदारी देण्याची काँग्रेसची परंपरा आहे. महिलांचा राजकारणातील सहभाग आणखी सक्रीय व्हावा यासाठी प्रत्येक जिल्हा काँग्रेस कमिटीत एक महिला कार्याध्यक्ष नियुक्त करण्याचा निर्णय घेऊन महिला भगिणींना मकरसंक्रांतीची भेट देत असल्याची घोषणा पटोले यांनी केली आहे.

. स्थानिक स्वराज्य संस्था निवडणुकीत 50 टक्के जागा राखीव ठेवण्याचा क्रांतीकारी निर्णयही काँग्रेसच्या सरकारनेच घेतला होता. आताही उत्तर प्रदेश विधानसभेच्या निवडणुकीत 40 टक्के महिलांना उमेदवारी देण्याचा क्रांतीकारी निर्णय पक्षाच्या राष्ट्रीय सरचिटणीस प्रियंका गांधी यांनी घेतला आहे.

 काँग्रेसच्या उमेदवारांच्या पहिल्या यादीत 40 टक्के महिलांना उमेदवारी देऊन त्यांनी नवा आदर्श घालून दिला आहे, असं पटोले म्हणाले.. स्थानिक पातळीवर महिलांना जास्तीत जास्त संधी देऊन त्यांचा राजकारणातील व निर्णय प्रक्रियेतील सहभाग आणखी वाढावा यासाठी हा निर्णय घेतला असल्याचे त्यांनी स्पष्ट केलं.