वादग्रस्त वक्तव्य प्रकरण: मंत्री गुलाबराव पाटील यांनी मागितली माफी.
जळगावमधील एका प्रचारसभेत शिवसेनेचे नेते आणि मंत्री गुलाबराव पाटील यांनी आक्षेपार्ह वक्तव्य केले होते. मंत्री गुलाबराव पाटील यांनी खासदार आणि अभिनेत्री हेमा मालिनी यांचे नाव घेत वादग्रस्त वक्तव्य केले होते. त्यावरून सर्व स्तरातून गुलाबराव पाटील यांच्यावर मोठ्या प्रमाणात टीका होत होती. अशातच आता गुलाबराव पाटील यांनी त्या वादग्रस्त वक्तव्याबाबत माफी मागितली आहे.
माझ्या मतदारसंघातील रस्ते हे हेमा मालिनीच्या गालासारखे बनवले असल्याचे गुलाबराव पाटील यांनी म्हटले होते. इथले रस्ते अभिनेत्री हेमा मालिनीच्या गालासारखे आहेत. जर रस्ते तसे नसतील तर राजीनामा देऊन टाकेन, असे वादग्रस्त वक्तव्य गुलाबराव पाटील यांनी केले होते. त्यांच्या या वक्तव्यावरून वाद सुरू झाला होता.
वादग्रस्त वक्तव्य अंगलट येणार असे दिसत असताना गुलाबराव पाटील यांनी माफी मागितली आहे. माझ्या भाषणातील वक्तव्यामुळे कोणाच्या भावना दुखावल्या गेल्या असतील तर मी दिलगिरी व्यक्त करत माफी मागतो, असे गुलाबराव पाटील म्हणाले आहेत. भाजपकडून विरोध होत असताना महाविकास आघाडीमधील राष्ट्रवादी पक्षाकडून देखील गुलाबराव पाटील यांच्या वादग्रस्त वक्तव्याचा निषेध होत होता.
दरम्यान, राज्याच्या महिला आयोगाच्या अध्यक्षा आणि राष्ट्रवादी काँग्रेस पार्टीच्या नेत्या रुपाली चाकणकर यांनी देखील गुलाबराव पाटील यांच्या वक्तव्याचा निषेध व्यक्त केला होता. त्यानंतर आता गुलाबराव पाटील यांनी माफी मागितली आहे.
0 Comments