पंढरपूरसाठी जनतेच्या मनातीलच उमेदवार दिला आहे

 पंढरपूर विधानसभा पोटनिवडणुकीसाठी जनतेच्या मनातीलच उमेदवार दिला जाईल. उमेदवाराची घोषणा पक्षाध्यक्ष खासदार शरद पवार व प्रदेशाध्यक्ष जयंत पाटील हे करतील, असे सांगत भगीरथ भालके हेच उमेदवार असतील, असे स्पष्ट संकेत उपमुख्यमंत्री अजित पवार यांनी दिले आहेत.

पंढरपूर विधानसभा पोटनिवडणुकीसाठी राष्ट्रवादीची बैठक रविवारी (दि. 21) आयोजित करण्यात आली होती. यानंतर उपमुख्यमंत्री अजित पवार बोलत होते. यावेळी जलसंपदामंत्री जयंत पाटील पालकमंत्री दत्तात्रय भरणे, आमदार संजय शिंदे, दीपकआबा साळुंखे-पाटील, जिल्हाध्यक्ष बळीराम साठे, पक्ष निरीक्षक सुरेश घुले, जिल्हाकार्याध्यक्ष उमेश पाटील, 'विठ्ठल'चे चेअरमन भगीरथ भालके आदींसह पदाधिकारी व कार्यकर्ते उपस्थित होते.उपमुख्यमंत्री अजित पवार कार्यकर्त्यांना मार्गदर्शन करण्यासाठी उठले असता, कार्यकर्त्यांनी भगीरथ भालके यांच्या नावाच्या घोषणा द्यायला सुरुवात केली. यावेळी अजित पवार म्हणाले, शांत राहा, तुमच्या मनातीलच उमेदवार पक्षाकडून दिला जाईल. पक्षाने दिलेल्या उमेदवारास निवडून देण्याची जबाबदारी तुमची सर्वांची आहे. महाविकास आघाडीतील शिवसेना, काँग्रेस व राष्ट्रवादी काँग्रेस यांच्याबरोबर महाविकास आघाडीतील घटक पक्ष असलेल्या शेतकरी संघटना यांनी उमेदवार निवडून आणण्याची जबाबदारी घेत विरोधकांचे डिपॉझिट जप्त करण्याची कामगिरी केली पाहिजे.जयंत पाटील म्हणाले, मतदारसंघातील पदाधिकारी व कार्यकर्ते यांची मते जाणून घेतल्यानंतर तुम्ही जो विचार करताय तोच उमेदवार देण्यात यावा, असा निरोप शरद पवार यांना कळवण्यात येणार आहे. तेच उमेदवार जाहीर करतील. मात्र, पक्ष जो उमेदवार देईल, त्याला निवडून आणण्यासाठी पदाधिकारी व कार्यकर्त्यांनी एकजुटीने प्रयत्न करावेत, असे आवाहन त्यांनी केले.