धक्कादायक! पंढरपूर तालुक्यातील वाखरी येथे वृद्ध महिलेची हत्या; मानेवर, डोक्यावर धारदार शस्त्राने केले वार

धक्कादायक!  पंढरपूर तालुक्यातील वाखरी येथे वृद्ध महिलेची हत्या; मानेवर, डोक्यावर धारदार शस्त्राने केले वार

सकाळी फिरण्यासाठी घरातून बाहेर पडल्या, त्या परत आल्याच नाहीत; दुपारी शेतामध्ये आढळला मृतदेह; महिलेचा खून

पंढरपूर तालुक्यातील वाखरी  येथील वृद्ध महिला मालन किसन ढाळे (वय ६५) यांचा अज्ञातांक खून करण्यात आल्याचा प्रकार समोर आला. या प्रकारानंतर वाखरी परिसरात खळबळ उडाली आहे.

वाखरी येथील गोसावी पेट्रोल पंपाच्या पाठीमागे असलेल्या शेतामध्ये मालन किसन ढाळे यांचा मृतदेह बुधवारी सायंकाळी चार वाजण्याच्या सुमारास आढळून आला.

 मालन ढाळे या सकाळी फिरायला म्हणून गेल्या होत्या. त्या परत आल्या नाहीत, अशी माहिती सांगितली जात आहे. 

या घटनेची माहिती मिळताच गावचे पोलीस पाटील बाळासाहेब शेंडे यांनी पंढरपूर ग्रामीण पोलीस ठाण्यास या खूनाची खबर दिली. 

त्यानंतर घटनास्थळी उपविभागीय पोलीस अधिकारी डॉ. अर्जुन भोसले, ग्रामीण पोलीस ठाण्याचे पोलीस निरीक्षक भुजबळ यांनी भेट देऊन पाहणी केली आहे.

मालन ढाळे यांच्या मानेवर, डोक्यावर व डोळ्याच्या बाजूला धारदार शस्त्राने वार केल्याचे प्रथमदर्शनी निदर्शनास आले आहे. त्यांचा खून कोणी आणि कोणत्या कारणासाठी केला

 हे अद्याप स्पष्ट झाले नाही. पंढरपूर ग्रामीण पोलिसांनी पंचनामा केला असून, पुढील तपास ते करत आहेत.