डॉ. नरेंद्र दाभोळकर यांच्या खुनाच्या सूत्रधारांना पकडण्याबाबत.. अंधश्रध्दा निर्मूलन समिती शाखा: सांगोला, सांगोला तहसीलदार यांना निवेदन

  डॉ. नरेंद्र दाभोळकर यांच्या खुनाच्या सूत्रधारांना पकडण्याबाबत..

अंधश्रध्दा निर्मूलन समिती शाखा: सांगोला, सांगोला तहसीलदार यांना निवेदन 

या २० ऑगस्ट २०२३ ला डॉ. नरेंद्र दाभोळकर यांच्या निर्घृण खुनाला दहा वर्षे पूर्ण होत आहेत. डॉ. नरेंद्र दाभोळकर यांच्या खुनातील संशयित आरोपी म्हणून सीबीआयने २०१६ मध्ये वीरेंद्र तावडे, ऑगस्ट २०१८ मध्ये शरद कळसकर आणि

 सचिन अंदुरे व मे २०१९ मध्ये संतीव पुनाळेकर व विक्रम भावे यांना अटक करुन त्यांच्यावर आरोपपत्र दाखल केलेले आहे. त्या विषयी खटला अजून चालू आहे. या खुनाचा तपास विरेंद्र तावडे या नावापर्यंत येऊन थांबलेला आहे. या खुनामागील सूत्रधार कोण आहेत, हे अद्याप स्पष्ट झालेले नाही..

डॉ. नरेंद्र दाभोळकर, कॉ. गोविंद पानसरे, प्रा. कलबुर्गी व गौरी लंकेश या चारही खुनाचे एकमेकांत गुंतलेले धागेदोरे तपासयंत्रणानी उकलेले आहेत. या गुन्ह्यामधील काही संशयीत आरोपी समान आहेत, 

तसेच दोन समान शस्त्रे या चार खुनामध्ये वापरलेले आहेत. बंगळुरू येथील न्याय वैद्यकिय प्रयोग शाळेच्या अहवालानुसार डॉ. दाभोळकर व कॉ. पानसरे यांच्यावर एकाच बंदुकीतून गोळ्या झाडण्यात आलेल्या आहेत.

 न्यायालयात दाखल केलेल्या शस्त्र विषयक अहवालानुसार कॉ. पानसरे यांच्या खुनासाठी वापरलेले एक पिस्तुल प्रा. कलबुर्गी आणि गौरी लंकेश यांच्या खुनासाठी देखील वापरले आहे. 

या चारही खुनाच्या संदर्भातील शेवटची अटक जानेवारी २०२० मध्ये झालेली आहे. कर्नाटक एस. आय. टी. ने झारखंड या राज्यातून ऋषीकेश देवडीकर या गौरी लंकेश खुनातील संशयीत आरोपीला अटक केलेली आहे. 

तो तेथे पेट्रोल पंपावर काम करत होता, यावरुन हे खून करणा-या गटाच्या यंत्रणेत किती लांबवर हात पसरले आहेत हे लक्षात येईल. सीबीआयने दाखल केलेल्या पुरवणी आरोपपत्रात असे म्हंटले आहे कि, सदर खुनाचा तपास करताना या प्रकरणांतील संशयीत 

आरोपीचा कॉ. गोविंद पानसरे, प्रा. कलबुर्गी व गौरी लंकेश यांच्या खुनाशी असलेला संबंध रेकॉर्डवर आलेला आहे. व त्यातून हे स्पष्ट झाले आहे कि, हि फक्त खुनाची घटना नसून हे दहशतवादी कृत्य आहे. त्यामुळे या गुन्ह्यातील आरीपीनां Unlawful Activities Prevention Act 1967 हा कायदा लावण्यात आलेला आहे.

पुढील तपास होऊन डॉ. नरेंद्र दाभोळकरांच्या खुनामागील सूत्रधार कोण आहेत, हे सीबीआयने शोधून काढले पाहिजे. अन्यथा देशातील विवेकवादी विचारवंत, कार्यकर्ते, पत्रकार यांच्या अभिव्यक्तिला असलेला धोका संपणार नाही. त्यामुळे या खुनाच्या मागील सूत्रधारानां लवकरात लवकर अटक करावी, अशी मागणी या निवेदनाच्या माध्यमातून आम्ही तुम्हाला करीत आहोत..