‘भविष्यात असे प्रकार नको’, आमदारांच्या नृत्यावर मुख्यमंत्री शिंदे नाराज

 ‘भविष्यात असे प्रकार नको’, आमदारांच्या नृत्यावर मुख्यमंत्री शिंदे नाराज

 महाराष्ट्राचे मुख्यमंत्री म्हणून एकनाथ शिंदे यांच्या नावाची घोषणा झाल्यानंतर गोव्यातील हॉटेलमध्ये त्यांच्या समर्थक आमदारांच्या एका गटाने केलेल्या नृत्यावर शिंदे यांनी शुक्रवारी नाराजी व्यक्त केली. तसेच भविष्यात असे प्रकार घडणार नाहीत, याची काळजी घेण्यास सांगितले.

एकनाथ शिंदे राज्याचे पुढील मुख्यमंत्री असतील, अशी घोषणा भाजपचे ज्येष्ठ नेते देवेंद्र फडणवीस यांनी गुरुवारी केली. त्यानंतर गोव्यातील हॉटेलच्या लॉबीमध्ये जमलेल्या आमदारांनी एकच जल्लोष केला. यातील काहीजण तर टेबलावर चढून नाचल्याचे व्हिडीओद्वारे समोर आले होते. मराठी गाण्यावरील त्यांचे नृत्य व्हायरल झाल्यानंतर नेटकऱ्यांनी ते अतिशय अशोभनीय असल्याची टीका केली होती.

महाराष्ट्रात जवळपास १० दिवसांच्या सत्तानाट्यानंतर आपल्या समर्थक आमदारांसह शिवसेनेतून बंडखोरी केलेल्या शिंदे यांनी मुख्यमंत्रिपदाची, तर फडणवीस यांनी उपमुख्यमंत्रिपदाची शपथ घेतली. मुंबईत झालेल्या या शपथविधी सोहळ्यानंतर शिंदे शुक्रवारी पहाटे दोना पावला येथील हॉटेलमध्ये परतले. यावेळी समर्थक आमदारांना संबोधित करताना त्यांनी त्यांच्या नृत्यावर तीव्र आक्षेप नोंदवला. तसेच भविष्यात असे प्रकार घडणार नाहीत, याची काळजी घेण्यास सांगितले.

दरम्यान, ‘अशाप्रकारे नाचणे ही चूक होती, हे आम्ही मोठ्या मनाने मान्य करतो. नागरिकांनी निवडून दिलेल्या आणि महाराष्ट्राच्या भल्यासाठी काम करण्याचे ध्येय बाळगणाऱ्या आमदारांना हे शोभत नाही. आनंदाच्या भरात अशा चुका होतात, पण खरेतर त्या व्हायला नकोत’, असे बंडखोर आमदार व शिंदे गटाचे प्रवक्ते दीपक केसरकर यांनी पत्रकारांसोबत बोलताना नमूद केले.