मतदान ओळखपत्र : 17 वर्षांच्या तरुणांना ‘ॲडव्हान्स बुकिंग’ची सोय
आता तुम्ही तुमचे नाव वयाच्या 17 व्या वर्षीही मतदार यादीवर पाहू शकतो. त्यासाठी आता 18 वर्षे वाट पाहण्याची आवश्यकता नाही. वयाची 17 वर्षे पूर्ण केलेल्या कोणत्याही व्यक्तीस मतदार यादीवर नाव नोंदणी करता येणार आहे. अर्थात मतदार यादीवर नाव आले म्हणून सदर व्यक्तीस मतदान करता येणार नाही. मतदानासाठी मात्र त्याला 18 वर्षे पूर्ण होणेच बंधनकारण असणार आहे. भारतीय निवडणूक आयोगाने नव्या नियमाद्वारे नागरिकांना ही संधी उपलब्ध करुन दिली आहे.
मुख्य निवडणूक आयुक्त राजीव कुमार आणि निवडणूक आयुक्त अनुप चंद्र पांडे यांच्या नेतृत्वाखालील आयोगाने देशभरातील सर्व राज्यांचे मुख्य निवडणूक अधिकारी, निवडणूक नोंदणी अधिकारी, सहायक निवडणूक नोंदणी अधिकारी यांना दिलेल्या निर्देशानुसार नव्या सूचनेनुसार मतदारांची नोंदणी पार पडणार आहे. नव्या नियमानुसार मतदार यादीत नाव नोंदणी करण्यासाठी वय वर्षे 17 पूर्ण असलेल्या तरुणांनी आपापले नाव नोंदणी अर्ज एक एप्रिल, एक जुलै आणि एक ऑक्टोबर या पात्रता तारखांच्या कालावधीमध्ये पोहोचवावे अथवा दाखल करावेत, असे आयोगाने म्हटले आहे.
तरुणांना हे अर्ज दाखल करण्यासाठी एक जानेवारीपर्यंत प्रतिक्षा करायला लागू नये यासाठी आवश्यक ती तांत्रिक मदत घेण्यात यावी, असेही आयोगाने म्हटले आहे. मुख्य निवडणूक आयोगाने स्पष्ट केल्यानुसार देशभरातील मतदार याद्या आता दर तीन महिन्यांनी अद्ययावत केल्या जातील. त्यामुळे मतदानासाठी पात्र होण्यासाठी वयोमर्यादा प्राप्त केलेल्या तरुण तरुणांना नाव नोंदणी शक्य होणार आहे.
0 Comments