आनंदा माने यांच्या वाढदिवसादिवशी जन्मलेल्या मुलींच्या नावे 15 हजार रूपयांची ठेव ठेवण्याचा संकल्प

 आनंदा माने यांच्या वाढदिवसादिवशी जन्मलेल्या मुलींच्या नावे 15 हजार रूपयांची ठेव ठेवण्याचा संकल्प

सांगोला/प्रतिनिधी ःसांगोला नगरपरिषदेचे माजी नगरसेवक तथा गटनेते तसेच राजमाता प्रतिष्ठानचे संस्थापक अध्यक्ष आनंदा (भाऊ) माने यांनी आपल्या वाढदिवसानिमित्त दि. 3 ऑगस्ट 2022 रोजी सांगोला तालुक्यात जन्मलेल्या मुलींच्या नांवे 15 हजार रूपयांची राजमाता महिला पतसंस्थेमध्ये मुदतठेव ठेवण्याचा संकल्प केला आहे. समाजामध्ये मुलींचे प्रमाण वाढावे, मुलगा व मुलगी असा भेदभाव होऊ नये, मुलींच्या जन्माचे स्वागत व्हावे या उदात्त हेतूने 2015 सालापासून हा सामाजिक संकल्प करून आनंदा माने यांनी तालुक्यामध्ये एक आदर्श निर्माण केला आहे.

यावर्षी दि. 3 ऑगस्ट 2022 रोजी तालुक्यामध्ये जन्माला येणार्‍या मुलींच्या नांवे 15 हजार रूपयांची ठेव ठेवली जाणार असून ती प्रत्येक 7 वर्षांनी दामदुप्पट करून मुलीच्या 21 व्या वर्षी ही रक्कम जवळपास 1 लाख 20 हजार रू. इतकी होणार आहे. ही रक्कम मुलीच्या शिक्षणासाठी तसेच तिच्या लग्नकार्यासाठी वापरण्यात यावी, मुलीच्या आई-वडीलांवर आर्थिक ताण पडू नये, या सामाजिक हेतूने आनंदा माने यांनी हा संकल्प सुरू केला आहे.

आनंदा माने यांच्या वाढदिवसादिवशी दि. 3 ऑगस्ट 2015 साली तालुक्यातून जन्माला आलेल्या 5 मुलींच्या नावे 5000 रूपयांची, 2016 साली 7 मुलींच्या नांवे 7000 रू, 2017 साली 4 मुलींच्या नांवे 10,000 रू, 2018 साली 6 मुलींच्या नांवे 10,000 रू, 2019 साली 3 मुलींच्या नांवे 10,000 रू, 2020 साली 5 मुलींच्या नांवे 10,000 रू, 2021 साली 6 मुलींच्या नांवे 15,000 रू अशी मुदत ठेव ठेवण्यात आली आहे.

त्यांनी या आगळ्यावेगळ्या संकल्पातून एक सामाजिक कार्य तर केले आहेच त्याचबरोबर समाजासमोर एक आदर्श सुध्दा घडविला आहे. या संकल्पाबद्दल जनमाणसातून आनंदा (भाऊ) माने यांचे कौतुक व आभार व्यक्त होत आहेत.