मिरवणुकीत डीजेसमोर नाचण्यातून वाद; चक्क चाकूने भोसकून युवकाचा खून!

 मिरवणुकीत डीजेसमोर नाचण्यातून वाद; चक्क चाकूने भोसकून युवकाचा खून!

नांदेड: जिल्ह्यात सर्वत्र डॉ. बाबासाहेब आंबेडकर जयंतीचा उत्साह शांततेत पार पडत असताना शहरातील सिडको परिसरातील बळीरामपुर येथे डीजेच्या गाण्यावर नाचण्याच्या वादातून युवकाचा चाकूने भोसकून खून करण्यात आल्याची घटना घडली आहे. या प्रकरणातील मृत युवकाचे नाव सचिन थोरात असे आहे. तर यामध्ये आणखी एकजण गंभीर जखमी झाला आहे. दोन मारेकऱ्यांच्या पोलिसांनी मुसक्या आवळल्या आहेत.

बळीरामपूर येथील किशोर ठाकूर आणि शेख आदिल असे दोघे मिरवणुकीत इतरांना अडथळे आणत नाचायला लागले. तेव्हा सचिन उर्फ बंटी थोरातने त्या दोघांना मिरवणुकीतून बाहेर जाण्यास सांगितले. त्यामुळे चिडलेल्या किशोर ठाकूरने आपल्या कमरेला असलेला चाकू काढून सचिन थोरातच्या शरिरावर अनेक ठिकाणी सपासप वार केले आणि त्याला भोसकले. तसेच सुमेध उर्फ बाळा राजू वाघमारे यासही चाकू मारून जखमी केले.

जखमी सुमेध उर्फ बाळा राजू वाघमारे याच्यावर शासकीय रुग्णालय विष्णूपुरी येथे उपचार सुरू असून रात्री साडेबाराच्या सुमारास जखमीच्या जबाबावरून नांदेड ग्रामीण पोलीस ठाण्यात किशोर ठाकूर आणि शेख आदिलविरुद्ध भारतीय दंड संहितेच्या कलम 302, 307, 34 आणि अॅट्रॉसिटी कायदा कलम 3 प्रमाणे गुन्हा दाखल करण्यात आला. पोलिसांनी दोन्ही आरोपींना अटक करून कोर्टात हजर केले असता कोर्टाने दोन्ही आरोपींना चार दिवसाची पोलीस कोठडी सुनावली आहे.