कर्जबाजारीपणामुळे २८ वर्षीय इंजिनिअरचा बँकेवर दरोडा

 कर्जबाजारीपणामुळे २८ वर्षीय इंजिनिअरचा बँकेवर दरोडा  

ऑनलाइन ट्रेडिंगमुळे कर्जाचा डोंगर वाढल्याने एका २८ वर्षीय अभियंत्याने थेट बँक लुटल्याचा प्रकार समोर आला आहे. त्याने चाकूच्या धाकावर बँकेतील 85.38 लाख रुपयांची रक्कम चोरल्याचा आरोप आहे. ही घटना बंगळुरूमध्ये घडली असून पोलिसांनी त्याला अटक केली आहे.

धीरज संपांगी असे आरोपीचे नाव असून तो एका सॉफ्टवेअर कंपनीत इंजिनिअर आहे. ऑलिम्प ट्रेड या यूएस-आधारित ट्रेडिंग कंपनीमध्ये अयशस्वी गुंतवणूक केल्यानंतर त्याने बँक लुटण्याचा निर्णय घेतला. त्याने सुमारे 34 लाख रुपये गुंतवले होते आणि त्याने आपला पगार, त्याच्या कुटुंबाचे सोने वापरले होते. 

तसेच मित्रांकडून देखील पैसे उसने घेतले. त्याच्यावर ऑनलाइन टेड्रींगमुळे ३५ लाखांचे कर्ज झाले होते. त्यामुळे त्याने चाकूच्या धाकावर बँक लुटण्याचा निर्णय घेतला. एसबीआयचे कर्मचारी बँक बंद करत असताना त्याने एक बँकेच्या कर्मचाऱ्याला चाकूचा धाक दाखवून बँक उघडायला सांगितले. जीवाच्या भीतीने कर्मचाऱ्यांनी देखील त्याचे म्हणणे ऐकले. 

त्यानंतर आरोपीने त्यांना बँकेच्या स्ट्राँग रूममध्ये नेले. तेथील 3 लाख 76 हजार 200 रुपये रोख आणि 1800 ग्रॅम सोने त्याने बॅगेत भरले, असे माडीवाला उपविभागाचे एसीपी सुधीर हेगडे यांनी सांगितले. अखेर या प्रकरणाचा छडा लावण्यात पोलिसांना यश आले आणि त्यांनी 18 जानेवारीला संध्याकाळी आरोपीला अटक केली. 

त्याची कसून चौकशी केली असता त्यानेच बँक लुटल्याचे समोर आले. त्याला ३० हजार रुपये मासिक पगार मिळतो. पण, मित्रांकडून घेतलेले पैसे द्यायचे होते, त्यामुळे बँक लुटीची योजना आखली. त्याने युट्यूबवर बँक चोरीचे काही व्हिडिओ पाहिले. त्यानंतर जवळपासच्या बँकांची पाहणी केली, असे पोलिसांनी सांगितले.

बँकेतील दरोड्यानंतर पोलिसांनी सीसीटीव्ही फुटेज पाहून धीरचा शोध घेतला. ज्या मित्राकडून पैसे घेतले त्यांच्या घरी जाऊन पोलिसांनी चौकशी केली. पण, प्रत्येक वेळी त्याने पोलिसांना चकवा दिला. त्यानंतर एका मित्राची कार घेऊन तो गेला असल्याची माहिती मिळाली. त्यानुसार पोलिसांनी ट्रॅक केले असता आरोपी धीरजला शोधण्यात त्यांना यश आले, असेही पोलिसांनी सांगितले.