सोलापूर जिल्ह्यात आजपासून लसीकरण होणार सुरू

 सोलापूर जिल्ह्यात आजपासून लसीकरण होणार सुरू

सोलापूर : सोलापूर जिल्ह्यात(solapur) जापनीज मेंदूज्वर तसेच १५ ते १८ वर्षे वयोगटातील व्यक्‍तींसाठी सोमवारपासून (ता.३) कोविड लसीकरण मोहीम राबविण्यात येणार आहे.या दोन्ही मोहिमांची तयारी पूर्ण झाली असून लसीकरणासाठी आरोग्य यंत्रणा व जिल्हा परिषद प्रशासन सज्ज असल्याची माहिती जिल्हा परिषदेचे मुख्य कार्यकारी अधिकारी दिलीप स्वामी यांनी दिली. पंधरा ते अठरा वयोगटातील मुलांसाठी कोविड लसीकरणासाठी ऑनलाईन व ऑनस्पॉट असे दोन्ही प्रकारचे पर्याय उपलब्ध करून दिले जाणार आहेत.

जिल्ह्यामध्ये जापनीज मेंदूज्वरच्या लसीकरणासाठी ग्रामीण भागाला ८ लाख ९४ हजार ३५७ व सोलापूर महानगरपालिका हद्दीसाठी १ लाख ८२ हजार असे एकूण जिल्ह्याला १० लाख ७६ हजार ३५७ एवढे उद्दिष्ट देण्यात आले आहे. या मोहिमेमध्ये १ वर्ष ते १५ वर्ष वयोगटातील बालकांना जापनीज मेंदूज्वरची लस दिली जाणार आहे.

 पहिले दोन आठवडे संस्थेमध्ये तर पुढील लसीकरण गावनिहाय करण्यात येणार आहे. यासाठी शिक्षण विभाग महिला व बालकल्याण विभाग तसेच ग्रामपंचायत विभागाची मदत घेतली जाणार आहे. या सर्वांना प्रशिक्षण देऊन मोहिमेचे स्वरूप व उद्दिष्टपूर्तीसाठीचे नियोजन केले असल्याची माहिती सीईओ स्वामी यांनी दिली.

१५ ते १८ वर्षे वयोगटातील २ लाख २६ हजार ४१२ लाभार्थींसाठी कोवीड लसीकरण मोहीम राबविण्यात येणार आहे. यासाठी कोवॅक्‍सिन ही लस देण्यात येणार आहे. प्रातिनिधिक स्वरूपात उद्या (सोमवारी) ग्रामीण भागामध्ये ११ ठिकाणी या लसीकरणाची सुरुवात केली

 जाणार आहे. त्यानंतर सर्व आरोग्य संस्थांमध्ये लसीकरण करण्यात येणार आहे. सर्वांनी प्रशासनाच्या आवाहनास प्रतिसाद देऊन वरील दोन्ही लसीकरण मोहीम यशस्वी कराव्यात असे आवाहन जिल्हा परिषद सोलापूर मुख्य कार्यकारी अधिकारी दिलीप स्वामी यांनी केले आहे.