टेंभुर्णीत दलितांना हाताने काढायला लावली मानवी विष्ठा ! पोलिस निरीक्षक राजकुमार केंद्रेसह १० जणांवर कारवाईसाठी आता उच्च न्यायालयात धाव !
टेंभुर्णी येथील आण्णाभाऊ साठेनगर मधील मातंग समाजातील महिला व पुरुषांना जबरदस्तीने घरातून बाहेर काढून टेंभुर्णी पोलिस वसाहतीतील मानवी विष्ठा व मैला हाताने साफ करावयास भाग पाडल्या प्रकरणी टेंभुर्णी पोलिस स्टेशनचे तत्कालिन पोलिस निरीक्षक राजकुमार केंद्रे
व अन्य पोलिस कर्मचारी यांच्यावर वारंवार मागणी करूनही अद्यापपर्यंत कोणतीच कारवाई न झाल्यामुळे पिडीत तरुण राम लक्ष्मण आरडे ( रा.टेंभुर्णी ता.माढा ) यांनी मुंबई उच्च न्यायालयात धाव घेत न्यायासाठी उच्च न्यायालयाचे दरवाजे ठोठावले आहेत.अन्याय करणाऱ्या पोलिसांवर व त्यांच्यावर कारवाई करण्यास टाळाटाळ करणाऱ्या पोलिस अधिकारी यांचेवरही गुन्हा दाखल व्हावा यासाठी अ‍ॅड. आसावरी खांडकर यांच्या तर्फे याचिका दाखल केली आहे.
टेंभुर्णी शहरातील पोलीस स्टेशन लगत असलेल्या अण्णाभाऊ साठे नगर येथील मातंग समाजातील महिलांना मुलांना राहत्या घरी जाऊन धक्काबुक्की करत आहे अशा अवस्थेत घराबाहेर ढकलत आणून टेंभुर्णी पोलीस निरीक्षक राजकुमार केंद्रे यांनी २९ मे २०२१ रोजी दुपारी बाराच्या सुमारास वीस ते पंचवीस पोलीस कर्मचाऱ्याच्या सहाय्याने पोलीस स्टेशन आवारातील ती घाण तुम्हीच टाकलेली आहे, आणि ते तुम्हीच उचला असे म्हणत जवळपास
50 महिला व लहान मुले यांना शिवीगाळ करून त्यांना संपूर्ण कचरा,घाण,गटारी संडास,माणसांची व जनावरांची विष्ठा हाताने उचलायला लावली.यावेळी महिलांनी कचरा साफ करण्यास नकार देताच पोलीस निरीक्षक राजेंद्र राजकुमार केंद्रे यांनी अश्लील व अर्वाच्च भाषेत शिवीगाळ करून पोलीस कर्मचाऱ्यांसोबत काठीने, पट्ट्याने मारहाण करण्यात येईल,
असा धाक दाखवून त्यांच्याकडून पोलीस स्टेशन परिसरातील संपूर्ण कचरा,घाण,गटारी संडास,माणसांची व जनावरांची विष्ठा हाताने उचलायला लावली. यावेळी त्यांनी अर्वाच्य भाषेत शिवीगाळ दादागिरी करून पोलीस स्टेशन आवारातील घाण काढायला लावली,असा आरोप करीत दलित समाजाने व संघटनांनी केंद्रे यांचेसह वरील पोलिस कर्मचा-यांवर गुन्हा दाखल करण्याच्या मागणीसाठी उपोषणे,मोर्चा काढण्यात आला होता.
सोलापूर ग्रामीणच्या पोलिस अधीक्षक तेजस्वी सातपुते यांनी या प्रकरणाची गंभीर दखल घेत केंद्रे यांची उचलबांगडी करीत पदभार काढून घेतला होता. पिडीत समाजाला व आंदोलन करणा-यांना केंद्रेसह कर्मचाऱ्यांवर गुन्हा दाखल करण्याचे आश्वासन दिले होते.
परंतू अद्यापपर्यंत गुन्हा दाखल न झाल्याने पिडीत युवक राम आरडे यांनी रिट क्रमांक २७०/२०२२ ह्या याचिकेमध्ये टेंभुर्णी पोलिस ठाण्याचे तत्कालीन पोलिस निरीक्षक राजकुमार केंद्रेंसह पोलिस उपनिरीक्षक पोपट काशिद, पोलिस काॅन्स्टेबल राजेंद्र ठोंबरे, अभिमान गुटाळ, सचिन ननवरे यांचे दहाजणांवर अ‍ॅट्रॉसिटी कायद्याअंतर्गत कारवाई करण्याची मागणी करण्यात आली तसेच
महाराष्ट्र राज्याचे गृह सचिव, कोल्हापूर परिक्षेत्राचे विशेष पोलीस महानिरीक्षक, सोलापूर ग्रामीण पोलिस अधिक्षक, सोलापूर ग्रामीण पोलिस उपअधीक्षक, उपविभागीय पोलीस अधिक्षक करमाळा यांच्याविरुद्ध अनुसूचित जाती अनुसूचित जमाती पोलिस अत्याचार प्रतिबंधक कायद्यानुसार कारवाई करण्यात यावी अशी मागणी करण्यात आली आहे.
0 Comments