नोंदणी व मुद्रांक विभागाचे अधिकारी , कर्मचारी २१ सप्टेंबरपासन बेमदत संपावर

 नोंदणी व मुद्रांक विभागाचे अधिकारी , कर्मचारी २१ सप्टेंबरपासन बेमदत संपावर

नोंदणी व मुद्रांक विभागातील अराजपत्रित अधिकारी व कर्मचारी संघटनेच्या वतीने सर्वसंवर्गातील ५ ते ६ वर्षांपासून रखडलेल्या पदोन्नती करणे या प्रमुख मागणीसह २१ सप्टेंबरपासून बेमुदत संपावर जाण्याचा इशारा दिला आहे . वारंवार शासनाकडे पाठपुरावा करूनही मागण्या मान्य होत नसल्याने संघटनेने बेमुदत संपावर जाण्याचा निर्णय घेतला आहे . यामुळे दस्त नोंदणी थांबणार असल्याने शासनाच्या महसुलावरही परिणाम होणार आहे 

शासनाला दिलेल्या निवेदनात पदोन्नतीची कार्यवाही पूर्ण झाल्याशिवाय नवीन सेवा प्रवेश नियम लागू न करणे , विभागातील सर्व रिक्त पदे तत्काळ भरणे , वरिष्ठ लिपीक , कनिष्ठ लिपीक यांच्या ज्येष्ठता याद्या २०१८ पासून प्रलंबित आहेत , त्या अंतिम करणे , मुंबई शहरातील मुद्रांक जिल्हाधिकारी पद विभागातील पदोन्नतीने भरणे , कोरोनामुळे मृत्यू झालेल्या अधिकारी , कर्मचाऱ्यांच्या कुटुंबीयांना तत्काळ ५० लाखांची मदत करणे , कुटुंबातील एका व्यक्तीस अनुकंपा तत्त्वावर नोकरीत घेणे , तुकडेबंदी , रेरा कायद्यानुसार नोंदणी विभागातील अधिकारी , कर्मचाऱ्यांवरील कारवाई मागे घेणे , सहदुय्यम निबंधक वर्ग २  व दुय्यम निबंधक श्रेणी १ संवर्गाचे  एकत्रीकरण करणे , पदनामात बदल करणे , खात्याची विभागीय परीक्षा प्रत्येक वर्षी घेणे , विभागीय चौकशीची कार्यवाही मुदतीत पूर्ण करणे , बदल्या  करताना संघटनेस विचारात घेणे आदी  मागण्यांचा समावेश आहे . या निवेदनावर अध्यक्ष गजानन खोत , कार्याध्यक्ष अशोकराव चव्हाण तर सचिव सागर पवार यांच्या सह्या आहेत . वरील मागण्यांचा विचार न झाल्यास संपूर्ण राज्यात २१ सप्टेंबरपासून  बेमुदत संप करण्यात येणार असल्याचे निवेदनात नमूद केले आहे .