सांगोला तालुक्यात वाटंबरे ग्रामस्थांचा एसटी रोको आंदोलनाचा इशारा

सांगोला तालुक्यात वाटंबरे ग्रामस्थांचा एसटी रोको आंदोलनाचा इशारा

(शब्दरेखा एक्स्प्रेस न्युज संपादक संतोष साठे ९५०३४८७८१२)

सांगोला:- वाटंबरे (ता. सांगोला) येथे रत्नागिरी-नागपूर महामार्गावर प्रवाशी संख्या जास्त असूनदेखील एसटी बसेस थांबत नाहीत.

 त्यामुळे प्रवाशांमधून नाराजी व्यक्त केली जात आहे. एसटी बसेस थांबाव्यात, अशी मागणी वेळोवेळी करण्यात आली आहे.

तरीपण याची दखल घेतली जात नसल्याने वाटंबरे ग्रामस्थांनी एसटी बस रोको आंदोलन करण्याचा इशारा दिला आहे. 

महाराष्ट्र शासन एसटी प्रवाशाची संख्या वाढवण्यासाठी विविध उपाययोजना करत आहेत. परंतु, या योजनेला तिलांजली देण्याचे काम काही एसटी चालक करत आहेत. 

सांगोला तालुक्यातील वाटंबरे हे ठिकाण जागृत खंडोबा देवस्थानसाठी प्रसिद्ध आहे. खंडोबा देवस्थानच्या दर्शनासाठी वर्षभर भाविकांची मांदियाळी चालू असते. 

तसेच वर्षातून दोनदा या देवस्थानची मोठ्या प्रमाणावर यात्रा भरते. या यात्रेसाठी मोठ्या प्रमाणावर याठिकाणी भाविक, भक्त जमा होत असतात. तसेच हे ठिकाण रत्नागिरी-नागपूर राष्ट्रीय महामार्गावर येत असल्याने वाटंबरे, 

निजामपूर, राजुरी, अकोला, चिनके, य. मंगेवाडी, अंजनाळे तसेच आजूबाजूच्या परिसरातील प्रवाशांना सांगली, कोल्हापूर, मिरज, पंढरपूर, सांगोला, सोलापूर याठिकाणी जाण्यासाठी मोठ्या प्रमाणावर सोयीस्कर पडते. 

तसेच याठिकाणी राष्ट्रीयीकृत बँक, मोठ्या प्रमाणावर पतसंस्था, माध्यमिक शाळा तसेच हॉटेल व्यवसाय व विविध व्यावसायिकांसाठी मोठी बाजारपेठ उपलब्ध आहे. त्यामुळे याठिकाणी नागरिकांचे येणे-जाणे मोठ्या प्रमाणावर राहते.

परंतु, याठिकाणी राज्य परिवहन महामंडळाच्या सर्वच जलद गाड्यांना थांबा दिला असताना या गाड्या वार्‍याशी स्पर्धा करत प्रवासी न घेता निघून जात आहेत. 

वाटंबरे गावचे महादेव पवार यांनी राज्य परिवहन मंडळ महाव्यवस्थापक मुंबई, राज्य परिवहन महामंडळ सोलापूर व सांगोला आगाराशी वेळोवेळी लेखी व तोंडी तक्रार करूनदेखील या तक्रारीला एसटी चालक केराची टोपली दाखवण्याचे काम करत आहेत.

याठिकाणी जलद गाड्यांचा थांबा असताना गाड्या थांबत नसल्यामुळे वाटंबरे व आजूबाजूच्या गावातील प्रवाशांना सांगोला याठिकाणी जाऊन परत आपल्या गावाकडे यावे लागत आहे. त्यामुळे रात्री मोठ्या प्रमाणावर महिला, वयोवृद्ध नागरिकांना याचा त्रास होत आहे. 

राज्य परिवहन महामंडळाने याचा निर्णय घ्यावा. निर्णय न घेतल्यास वाटंबरे ग्रामस्थ एसटी रोको आंदोलन करण्याच्या तयारीत आहेत, अशा आशयाचे निवेदन सांगोला एसटी आगार, तहसील कार्यालय, सांगोला पोलिस स्टेशन यांना देण्यात आले आहे.

-महादेव पवारवाटंबरे याठिकाणी राज्य परिवहन महामंडळाच्या सर्व गाड्यांना थांबा असताना या मार्गावरून जाणार्‍या जलद गाड्या एकही प्रवासी न घेता निघून जातात.

 चालक, वाहकाला माहिती विचारली असता वाटंबरे येथे थांबा नाही, असे सांगितले जाते. त्यामुळे वाटंबरे ग्रामस्थ प्रवासी एसटी रोको आंदोलन करणार आहेत.