ब्रेकिंग न्यूज... डोंबिवली एमआयडीसीमध्ये बॉयलरचा भीषण स्फोट
ठाणे : डोंबिवलीत असणा-या एमआयडीसी परिसरात गुरुवारी दुपारी भीषण स्फोट झाल्याची माहिती समोर येत आहे. या स्फोटाचे नेमके कारण आणि तीव्रता अद्याप समजू शकलेली नाही.
मात्र, डोंबिवली एमआयडीसीपासून लांब अंतरावर असलेल्या परिसरातूनही आकाशात उठत असलेले काळ्या धुराचे प्रचंड लोट स्पष्टपणे दिसत आहेत.
एमआयडीसीतील कंपनीतील बॉयलरमधे ब्लास्ट झाल्याची माहिती आहे. एमआयडीसी फेज-२ मधील कंपनीत ब्लास्ट झाल्याचे सांगितले जाते.
प्राथमिक माहितीनुसार, एमआयडीसी परिसरातील अमोधन केमिकल कंपनीतील बॉयलरमध्ये हा स्फोट झाला आहे.
या कंपनीचे नाव अद्याप समजू शकलेले नाही. मात्र, हा स्फोट झाल्यानंतर डोंबिवली परिसरातील अनेक किलोमीटरपर्यंत या स्फोटाचे हादरे जाणवले.
त्यामुळे या परिसरातील अनेक इमारतींच्या काचा फुटल्या आहेत. हा स्फोट शक्तिशाली असण्याची शक्यता आहे. त्यामुळे आता स्फोटात किती जीवितहानी झाली आहे, याकडे सर्वांच्या नजरा लागल्या आहेत.
सध्या याठिकाणी अग्निशमन दलाच्या पाच गाड्या घटनास्थळी दाखल झाल्या असून आग विझविण्याचे काम सुरू आहे. या दुर्घटनेत सहा ते सात कामगार गंभीररीत्या जखमी झाल्याची माहिती आहे.
याठिकाणी अजूनही स्फोट सुरू असल्याचे समजते. त्यामुळे ही आग आणखी दूरवर पसरण्याची शक्यता आहे.
सध्या अग्निशमन दलाकडून आग नियंत्रण आणण्यासाठी शर्थीचे प्रयत्न सुरू आहेत. मात्र, सध्या एमआयडीसीच्या आजूबाजूच्या परिसरात स्फोटाच्या हाद-याने पडझड झाल्याचे दिसत आहे.
0 Comments