‘काय झाडी, काय डोंगर’ डायलॉग मारणाऱ्या पाटलांच्या गावात पाण्याची बोंब, युवा सेनेकडून टँकरने पाणीपुरवठा
काय झाडी, काय डोंगर, काय हॉटेल असा फिल्मी डायलॉग मारून प्रसिद्धी झोतात आलेले मिंधे गटाचे आमदार शहाजी बापू पाटील यांच्या मतदार संघात पिण्याच्या पाण्याची तीव्र टंचाई भासत आहे.
आमदार महोदय मिद्यानी कोट्यवधींचा विकास निधी आणल्याच्या वल्गना करीत असताना महुद ग्रामस्थांच्या घशाला पडलेली कोरड भागविण्यासाठी शिवसेना (उद्धव बाळासाहेब ठाकरे) पक्षाचे युवा सैनिक पुढे आले आहेत. युवासेनेने पदरमोड करून महुद ग्रामस्थांना पिण्याच्या पाण्याची सोय उपलब्ध करून दिली आहे.
सांगोल्याचे शिवसेनेचे आमदार शहाजी बापू पाटील हे तालुक्यात कोट्यावधी रुपयांचा निधी आणल्याचे सांगत असले तरी त्यांच्या महूद गावामध्ये मात्र ऐन पावसाळ्यात पाणीटंचाई निर्माण झाली आहे. येथील ग्रामस्थांना पाण्यासाठी दाहीदिशा फिरण्याची वेळ आली आहे.
अशावेळी शिवसेनेचे आमदार नव्हे तर युवा सेनेचे कार्यकर्ते येथील ग्रामस्थांच्या मदतीसाठी धावून आले आहेत. येथील पाणी टंचाई दूर करण्यासाठी युवा सेना तालुका प्रमुख सुभाष भोसले यांनी स्वखर्चाने पाण्याच्या टॅंकर सुरू केला आहे.
गावात पाण्याचा टॅंकर सुरु झाल्याने महूद ग्रामस्थांची पाण्यासाठीची वणवण आता थांबली आहे. काय झाडी, काय डोंगर , काय हॉटेल या डायलॉगमुळे आमदार शहाजी बापू पाटील यांची ख्याती जगभर पसरली आहे.
राज्यात सत्तांतर झाल्यानंतर सांगोला तालुक्यात कोट्यवधी रुपयांचा निधी आणल्याचा दावा त्यांनी केली असला तरी स्वतःच्या राहत्या गावात मात्र ऐन पावसाळ्यात पाण्यासाठी वणवण फिरण्याची वेळ येथील ग्रामस्थांवर आली. दरम्यान येथील पाणी टंचाईची चर्चा सर्वत्र सुरू आहे.
0 Comments