सांगोला देशमुखांच्या ३५ वर्षांच्या सत्तेला सुरुंग ; आबा बापू गटाचे ४ संचालक बिनविरोध माणगंगा सहकारी साखर कारखान्याच्या निवडणुकीत तानाजी पाटील यांच्या पॅनलचा निर्विवाद विजय

 सांगोला देशमुखांच्या ३५ वर्षांच्या सत्तेला सुरुंग ; आबा बापू गटाचे ४ संचालक बिनविरोध

माणगंगा सहकारी साखर कारखान्याच्या निवडणुकीत तानाजी पाटील यांच्या पॅनलचा निर्विवाद विजय 

सांगोला : तालुका प्रतिनिधी संपूर्ण आटपाडी, सांगोला, माण खटाव तालुक्याचे तसेच सोलापूर, सांगली आणि सातारा जिल्ह्याचे लक्ष लागून राहिलेल्या मानगंगा सहकारी साखर कारखाना आटपाडीच्या निवडणुकीकडे लागले होते. सत्ताधारी राजेंद्रअण्णा देशमुख व शेतकरी कामगार पक्षाचे डॉ. बाबासाहेब देशमुख प्रणित पॅनलमधील सर्वच्या सर्व

 उमेदवारांनी पराभवाच्या भीतीने आपले उमेदवारी अर्ज मागे घेतल्याने आटपाडी तालुक्याचे उदयोन्मुख नेतृत्व असलेल्या तानाजी पाटील यांच्या पॅनलने ३५ वर्षानंतर कारखान्यातील सत्ताधारी नेतृत्वाला सुरुंग लावून सर्वच्या सर्व म्हणजे १८ जागावर बिनविरोध विजय मिळवला. 

यामध्ये मा. आमदार दिपकआबा साळुंखे पाटील व सांगोला तालुक्याचे आमदार शहाजीबापू पाटील व यांच्या गटाचे तब्बल ४ संचालक बिनविरोध निवडून आले आहेत. 

गेल्या ३५ वर्षांपासून मानगंगा सहकारी साखर कारखाना आटपाडी यावर माजी आमदार राजेंद्र अण्णा देशमुख आणि शेतकरी कामगार पक्षाच्या आघाडीची निर्विवाद सत्ता होती. कारखान्यातील निष्क्रिय कारभारामुळे कारखान्यावर कर्जाचा डोंगर वाढत गेला 

परिणामी सभासदांची कोट्यावधी रुपयांची बिले थकवली गेली. त्यामुळे माजी आमदार राजेंद्र अण्णा देशमुख तसेच शेकापचे स्वर्गीय माजी आमदार गणपतराव देशमुख यांच्या कार्यकाळात कारखाना बंद करण्याची वेळ सत्ताधारी आघाडीवर आली.

 सभासदांच्या न्याय हक्कासाठी आणि सभासदांचे मंदिर असलेला कारखाना पुन्हा सुरू करण्यासाठी आटपाडीचे युवा नेतृत्व तानाजी पाटील यांनी सांगोल्याचे मा. आम. दिपकआबा साळुंखे पाटील व आमदार शहाजीबापू पाटील यांना साद घातली दोन्ही नेत्यांनी तानाजी पाटील यांच्या सोबत आघाडी करून सत्ताधाऱ्या विरोधात कडवे आव्हान निर्माण केले 

कारखान्याच्या आगामी निवडणुकीत पराभव समोर दिसू लागल्याने शेतकरी कामगार पक्षाचे नेते डॉ. बाबासाहेब देशमुख यांनी बैठकीतून काढता पाय घेऊन प्रथम आपल्या सर्वच्या सर्व उमेदवारांचे अर्ज मागे घेतले अनेक वर्ष सोबत असलेल्या शेतकरी कामगार पक्षाने निवडणुकीपूर्वीच माघार घेतल्याने माजी आमदार राजेंद्र अण्णा देशमुख यांनीही आपल्या 

सर्व उमेदवारांचे अर्ज माघारी घेऊन पराभवापूर्वीच शरणागती पत्करली. तानाजी पाटील यांच्या पॅनल मधील सर्वच्या सर्व म्हणजे अठरा उमेदवार बिनविरोध निवडून आल्याने मानगंगा सहकारी साखर कारखान्याचा भोंगा पुन्हा वाजविण्याचा मार्ग मोकळा झाला असल्याचे सभासदातून बोलले जात आहे. 

बिनविरोध संचालकात सांगोला तालुक्यातील आबा आणि बापू गटाचे कुंडलिक आनंदा आलदर, रमेश शिवाजी हातेकर, सुरेश पांडुरंग जरे आणि दादासाहेब वाघमोडे यांचा समावेश आहे. दरम्यान ३५ वर्षांनी माणगंगा सहकारी साखर कारखान्यात प्रथमच सत्तांतर झाल्याने 

अनेक वर्षापासून बंद पडलेला आणि जिल्हा मध्यवर्ती बँकेने ताब्यात घेतलेला सभासदांचा हा कारखाना पुन्हा एकदा सुरू होणार असल्याने आटपाडी, सांगोला, माण खटाव तालुक्यातील हजारो सभासद शेतकऱ्यांतून समाधान व्यक्त केले जात आहे. 

देशमुखावर "पाटील" पडले भारी...!!

सांगली, सोलापूर आणि सातारा या तीन जिल्ह्यात कार्यक्षेत्र असलेल्या मानगंगा सहकारी साखर कारखान्याच्या निवडणुकीकडे संपूर्ण पश्चिम महाराष्ट्राचे लक्ष लागून राहिले होते या निवडणुकीत 

आटपाडीचे युवा नेते तानाजी पाटील यांनी सत्ताधारी आघाडीसमोर पॅनल उभा करून आव्हान निर्माण केले. या पॅनलमध्ये त्यांनी सांगोला तालुक्याचे मा. आमदार दिपकआबा साळुंखे पाटील व आमदार शहाजीबापू पाटील यांना सोबत घेतले होते.

 तर विरोधी पॅनलमध्ये माजी आमदार राजेंद्र अण्णा देशमुख व शेतकरी कामगार पक्षाचे डॉ. बाबासाहेब देशमुख यांचे पॅनल होते. सत्ताधारी आघाडीने सर्वच्या सर्व अर्ज मागे घेतल्याने २ देशमुखावर ३ पाटील या निवडणुकीत भारी पडले असल्याची चर्चा सर्वत्र रंगली आहे.