सोलापुरातील गुजरात रबर फॅक्टरीला आग

 सोलापुरातील गुजरात रबर फॅक्टरीला आग

अक्कलकोट रोड एमआयडीसीतील गुजरात रबर फॅक्टरीला मध्यरात्री भीषण आग लागली. या आगीत फॅक्टरीतील साहित्य जळून खाक झाले. या आगीमुळे शेजारी असलेल्या गारमेंट कारखान्याचेही मोठे नुकसान झाले.

आग आटोक्यात आणण्यासाठी सोलापूर महापालिका अग्निशमन दलाला तब्बल 12 तासांहून अधिक वेळ शर्थीचे प्रयत्न करावे लागले. आगीच्या घटनेमुळे या कारखान्याचे बांधकाम अनधिकृत असल्याचे समोर आले आहे.

अक्कलकोट रोड एमआयडीसीत गुजरात येथील एका उद्योजकाचे गुजरात रिक्लेम रबस प्रॉडक्ट फॅक्टरी आहे. जवळपास 5000 हजार स्क्वेअर फुटात हा कारखाना चालतो. मध्यरात्री दोनच्या सुमारास या फॅक्टरीला आग लागली. रबरमुळे अवघ्या काही मिनिटांत आगीने उग्र रूप धारण केले. आकाशात आगीचे आणि धुराचे लोट पसरल्याने सर्वत्र भीतीचे वातावरण निर्माण झाले होते.

घटनेची माहिती समजताच, सोलापूर महापालिका अग्निशमन दलाचे प्रमुख केदार आवटे व त्यांचे 15 सहकारी घटनास्थळी दाखल झाले. फोम व पाण्याद्वारे आग विझविण्याचा प्रयत्न सुरू केला; परंतु रबरामुळे आग भडकत होती. आजूबाजूच्या कारखान्यांनाही झळ पोहोचल्याने एका रेडिमेड कापड गारमेंटच्या कारखान्यालाही आग लागली होती. 

आग आटोक्यात आणण्यासाठी अक्कलकोट, बार्शी, कुर्डुवाडी, पंढरपूर आणि एमटीपीसीसह पाण्याचे ट्रक्टर मागविण्यात आले. 60-70 गाडय़ा पाणी मारून दुपारी साडेतीनच्या सुमारास ही आग आटोक्यात आणण्यात आली. आगीचे नेमके कारण समजू शकले नाही.