पोलिसांनी अवैध गुटख्यासह १३ लाखांचा मुद्देमाल केला जप्त ; दोघांविरुध्द गुन्हा दाखल !
बंदी घालण्यात आलेला गुटखा व सुगंधी तंबाखूची चारचाकी वाहनातून बेकायदेशीरपणे वाहतूक प्रकरणी शिवाजीनगर पोलिसांनी एकाला अटक केली . अशोक कुमार देवडा असे त्याचे नांव असून त्याच्याकडून छोट्या टेम्पोसह १३ लाख १ हजार ३२० रुपयांचा मुद्देमाल जप्त करण्यात आला आहे . तर त्याचा साथीदार राजू पांडव हा फरारी झाला आहे . याप्रकरणी पोलिसात दोघांवर गुन्हा दाखल करण्यात आला आहे .
याबाबत पोलिसांतून मिळालेली माहिती अशी , शहरात एका छोट्या टेम्पोतून चोरुन गुटखा वाहतूक केली जाणार असल्याची माहिती शिवाजीनगर पोलिसांना मिळाली होती . त्यानुसार शिवाजीनगर पोलिसांनी रविवारी रात्री बंडगर मळा परिसरातील पाण्याच्या टाकीजवळ मिळालेल्या माहितीवरुन छत्रपती शाहु पुतळ्याच्या दिशेने निघालेला छोटा टेम्पो अडवला . त्या टेम्पोची तपासणी केली असता त्यामध्ये मोठ्या प्रमाणात सुगंधी सुपारी , तंबाखुजन्य गुटखा असल्याचे निदर्शनास आले .
पोलिसांनी वाहन चालक अशोक कुमार देवडा याच्यासह टेम्पो व मुद्देमाल ताब्यात घेतला . त्यामध्ये ७ लाख६२ हजार ८०० रुपयांची हिरा पान मसाल्याची ६० बाचकी , १ लाख ८७ हजार ६२० रुपयांची महा रोयॉल ७१७ तंबाखुची ५९ बाचकी , मोबाईल आणि साडेतीन लाखाचा टेम्पो असा १३ लाख १ हजार ३२० रुपयांचा मुद्देमाल मिळून आला .
याप्रकरणी अशोककुमार देवडा आणि राजू पांडव या दोघांच्या विरोधात गुन्हा दाखल केला आहे . फरार झालेल्या पांडव याचा पोलिस शोध घेत आहेत . पोलीस निरिक्षक महादेव वाघमोडे यांच्या मार्गदर्शनाखाली ही कारवाई सहाय्यक पोलिस निरिक्षक भालचंद्र देशमुख , उपनिरक्षक राजेंद्र यादव , कोळी , कांबळे , बाईत , बरगाले , माने यांच्या पथकाने केली .
0 Comments