सांगोल्यात तब्बल १३४ वर्षानंतर दुय्यम निबंधक कार्यालयाला मिळणार नवी इमारत ! सांगोला येथील तहसील कार्यालयाच्या आवारात तब्बल १३४ वर्षापासून अडगळीत असलेल्या दुय्यम निबंधक कार्यालयाचा अखेर लवकरच वनवास संपणार आहे . नोंदणी व मुद्रांक विभाग महाराष्ट्र यांचेमार्फत कोट्यावधी रुपये खर्च करून सर्व सोयी सुविधा असलेली दुय्यम निबंधक कार्यालयासाठी नवीन प्रशासकीय इमारत बांधून तयार झाल्याने जुन्या कार्यालयाचे नवीन जागेत लवकरच स्थलांतर होणार आहे .
तर नवीन इमारतीमुळे अधिकारी कर्मचाऱ्यांसह पक्षकारांची होणारी गैरसोय कायमस्वरूपी मिटणार असल्याने आनंदाचे वातावरण आहे . सांगोला तहसील कार्यालयाच्या आवारात तब्बल १३४ वर्षापासून अभिलेख कक्ष व नोंदणी कक्ष असे दुय्यम निबंधक कार्यालयाचे एका खोलीत कामकाज सुरू आहे . या ठिकाणी १ दुय्यम निबंधक , २ लिपिक , संगणक ऑपरेटरसह कर्मचारी एकत्र बसून दैनंदिन कार्यालयीन कामकाज पाहतात . तालुक्यातून मालमत्तेच्या खरेदी विक्रीसाठी आलेल्या पक्षकारांना या कार्यालयात धड नीट उभेही राहता येत नव्हते . अक्षरशः अधिकारी कर्मचाऱ्यांसह पक्षकारांची दस्त नोंदणी करताना दमछाक होत होती . कार्यालयाची ही अवस्था पाहून तात्कालीन सोलापूर जिल्हा मुद्रांक अधिकारी दुतोंडे यांनी सांगोला येथील दुय्यम निबंधक कार्यालयास स्वतंत्र इमारत असावी म्हणून नोंदणी व मुद्रांक विभाग महाराष्ट्र यांच्याकडे सतत पाठपुरावा करून कार्यालयासाठी स्वतंत्र प्रशासकीय इमारत मंजूर करून घेतली . सांगोला तहसील कार्यालयाच्या दक्षिणेकडील जागेत अर्थसंकल्पीय ४० / ५ ९ या कार्यक्रमाअंतर्गत सुमारे १ कोटी ३० लाख रुपये मंजूरी मिळाली होती . या निधीतून ठेकेदाराकडून २८ मे २०१८ रोजी प्रत्यक्षात इमारतीच्या बांधकामास सुरुवात झाली होती प्रत्यक्षात २७ मे २०२० पर्यंत हे बांधकाम पूर्ण होणे अपेक्षित होते . मात्र कोरोनाच्या काळात बांधकामाचे काम रखडल्याने नियोजित वेळेत पूर्ण होऊ शकले नाही . या इमारतीत अभिलेख कक्ष , नोंदणी कक्ष , रेकॉर्ड रूम पक्षकारांना थांबण्यासाठी हॉल , प्रसाधन गृह अशी सर्व सोयी सुविधा असलेली दुय्यम निबंधक कार्यालयाची इमारत बांधून तयार झाल्याने सर्वांचेच लक्ष वेधून घेत आहे . सध्या या कार्यालयातील अंतर्गत विजेची , फर्निचर व संरक्षक भिंतीच्या जागेत पेव्हिंग ब्लॉक बसविण्याचे कामे युद्धपातळीवर सुरू असून मार्च अखेर पूर्ण होतील असे शाखा अभियंता के.यु.गिरी यांनी सांगितले .
0 Comments