शासनाचे नियम धाब्यावर बसवून शासकीय कार्यालय, शाळा - कॉलेज जवळच गुटखा,सिगारेट विक्री ; कारवाई करण्याची मागणी
शासकीय कार्यालये, कॉलेज - शाळेपासून १०० मीटर परिसरात तंबाखूजन्य पदार्थ, गुटखा,सिगारेट विक्रीच्या टपरी, दुकानांना मनाई आहे , अशा प्रकारे शासनाचे आदेश असताना शासनाचे आदेश/नियम धाब्यावर बसवून अनेक शासकीय कार्यालये, कॉलेज- शाळांच्या परिसरात तंबाखूजन्य पदार्थ, सिगारेट, गुटखा विक्री जोमात सुरू आहे . संबंधित विक्रेत्यांवर कोणतीही कारवाई होत नाही.अश्या प्रकारच्या बेकायदेशीर व्यावसायिकांवर संबंधित अधिकारी कारवाई करण्यामध्ये तत्परता दाखवत नाहीत. त्यामुळे पालकवर्गातून संतप्त प्रतिक्रिया व्यक्त होत आहेत .
सांगोला शहरामधून अवैध गुटखा होलसेल दरात शहरासह तालुक्यातील सर्वच गावागावांत राजरोसपणे पोहोच केला जातो . त्याचप्रमाणे शेजारच्या जिल्ह्यांमध्येही सांगोल्यामधूनच होलसेल दरात मोठ्या प्रमाणात गुटख्याची वितरण व्यवस्था केली जाते . याकडे अन्न व औषध प्रशासन , पोलिस दुर्लक्ष करीत आहेत . या होलसेल गुटखा विक्रेत्यांचा बंदोबस्त करावा , यासाठी वरिष्ठ पातळीवरून अधिकाऱ्यांनी लक्ष घालणे काळाची गरज आहे .
शाळेच्या १०० मीटर परिसरात तंबाखूजन्य पदार्थ विक्रीस बंदी घातली असली तरी त्यावर कोणतीही कारवाई होत नाही . सांगोला शहर आणि तालुक्यातील अनेक ठिकाणच्या शासकीय कार्यालयाजवळ, शाळांसमोर तंबाखूजन्य पदार्थांची खुलेआम विक्री होत आहे .
मात्र , प्रशासन याकडे गांभीर्याने लक्ष देत नसल्याने याचा नाहक त्रास नागरिकांना सहन करावा लागत आहे . यावर पालकवर्गातून संतप्त प्रतिक्रिया उमटत असताना प्रशासन कारवाई करेल का ?, असाही मुद्दा उपस्थित केला जात आहे . आरोग्यास घातक ठरणाऱ्या गुटखा , तंबाखूच्या सेवनाचे धोके समजून सांगण्यापलीकडे शाळेत काहीही होत नाही .
ठोस उपाययोजनेसाठी शाळेच्या परिसरातील गुटखा विक्री रोखणे आवश्यक आहे . ते रोखण्याकडे संबंधित प्रशासनाचे पूर्णपणे दुर्लक्ष होत आहे . यासह शाळेच्या १०० मीटर परिसरात गुटखा विक्रीस बंदी असल्याचे फलक प्रत्येक शाळेच्या प्रवेशद्वारावर लावणे बंधनकारक असले तरी त्याची एकाही शाळेने दखल घेतलेली नाही . परिणामी , आजची तरुण पिढी गुटख्याच्या आहारी जात आहे . गुटखा सेवनाने कर्करोग होतो .
याची पहिली पायरी म्हणजे तोंड उघडता न येणे ही असते . आरोग्यास धोका निर्माण होतो . असे असतानाही यावर प्रशासन बंधन घालत नसल्याने नागरिकांमधून या प्रकरणी संतप्त प्रतिक्रिया उमटत आहेत . किमान ज्ञान मंदिर असणाऱ्या ठिकाणी तरी गुटखा विक्री करण्यास बंदी घालावी , अशी मागणी आता पालक वर्गातून जोर धरत आहे .
0 Comments